Hetta skeiðið fyri úrmælingadómarar okkara er eitt árligt afturvendandi skeið, sum FSF skipar fyri, beint fyri kappingarbyrjan. So at siga allir elitudómarar og eygleiðarar vóru møttir – eini 50 í tali. Hesir dómarar (íroknað hjálpardómarar og eygleiðarar) døma fyri tað mesta Betri deildina hjá monnum og 1. deild menn.
Umframt vanligu dagsskránna hjá dómarunum, hevði FaroeSoccer gjørt eina avtalu við dómararnar um at fáa tiknar nýggjar andlitsmyndir til profilar sínar á FaroeSoccer. Tað vóru allir dómararnir tíbetur við upp á, onkur teirra hevði enntá onga profilmynd frammanundan(!). Við hesum vil FaroeSoccer veita Johnleif Gerðisá, dómara, og Birgiri Sondum, eygleiðara og fotografi eina stóra takk fyri ómakin og vælviljan.
Tað er eingin loyna, at FaroeSoccer frá fyrsta degi hevur mett samstarvið – ella samanspælið – við dómararnar av størsta týdningi fyri góðskuna á FaroeSoccer, tvs. hvussu góðar og álítandi dáturnar eru á síðuni, og tað umfatar ALLAR dómarar til tær kappingar, sum FSF setur dómarar til, og sum FaroeSoccer skrásetur. Og hetta vóna vit fer at halda fram, okkara partur skal sum vanligt ikki liggja eftir.
FaroeSoccer roynir leypandi at fáa myndir av ØLLUm dómarum og at endurnýggja eldri myndir, og øll eru meira enn vælkomin at senda okkum myndir - selfies eru eisini væl brúkiligar! :-)
FaroeSooccer yskir øllum dómarunum eina hepna hond við dømingini og gott kappingarár.