Ger viðmerkingar til hesa greinina inni á Facebook síðu okkara http://www.facebook.com/FaroeSoccer
Tíðindaskriv frá Undri FF
Týsdagin 18. januar eru tað 5 ár síðani, Undrið Fótbóltsfelag var sett á stovn. Felagið hevði stovnandi aðalfund 18. januar 2006. Ein nevnd var sett, og nú var bara at dríva á. Stovnanin av felagnum gekk sera væl, og Fótbóltssambandið skal fáa stóra tøkk fyri at vera hugagóðir, tá ið vit hava søkt um ráð.
Hugskotið til Undrið FF kom á einum føðingardegi mitt í desember 2005. Nakrir av gestunum byrjaðu at tosa um at fara at sparka fótbólt næsta ár, og tað stutta av tí langa er, at allir vórðu samdir um at stovna eitt spildurnýtt felag. Felagið skuldi standa fyri flottum álopsfótbólti, undirhaldi og góðum ítróttaranda.
Soleiðis byrjaði søgan hjá Undrinum fyri 5 árum síðani. Hóast 5 ár ikki er long tíð, so hevur Undrið megnað at halda dampinum uppi øll árini. Frá at verða "hygge-kammerat" fótbóltur, er Undrið nú eitt felag við útvið 70 aktivum limum og hevur etablerað seg sum seriøst og málsøkið fótbóltsfelag, sum hevur sum mál at náa toppin í føroyskum fótbólti.
Nevndin í Undrinum vil nýta høvið at takka øllum, sum hava hjálpt og stuðlað okkum hesi árini. Ein serlig tøkk skal sendast til ídnu leikararnar, sum brúka tíð og orku at venja; til sponsorar, sum trúfast hava stuðlað okkum og síðst men ikki minst Fótbóltssambandið, sum mangan hevur hjálpt við ráðgeving og upplýsing.
Til seinast vilja vit ynskja tykkum øllum feløgum undir FSF góða eydnu í kappingarárinum 2011. Vit vóna, at árið fer at eydnast væl, og at vit hava nógvar góðar og spennandi dystir í væntu.
Vegna Undrið FF
Nikkil Heinesen, virkandi formaður.
FaroeSocecer gratulerar Undrið FF við hálvrundað degnum :-)