EB/Streymur og B36 flyta upp

Seinastu trý umførini í 2. deild gingu, sum prestur prædikaði. B36 helt fast um 2. plássið við at vinna allar sínar tríggjar dystir, og harvið hava teir vunnið allar 9 dystirnar í seinnu hálvu – og bara 3 mál fóru ígjøgnum hesar 9 seinastu dystirnar! Eitt gott avrik, sum tey eisini fegnast almikið um í sunnara enda í Gundadali. FaroeSoccer gratulerar við uppflytingini.

Hóast nýggja liðið í 3. deild, Undrið, leingi lá væl fyri í uppflytingarstríðnum, so gjørdust teir ov stuttir, tá tað kiksaði nakrar ferðir í seinnu hálvu. Men samnumtikið má hetta kappingarárið vera góðtikið í minsta Havnarfelagnum, tí bronsa í 3. deild er besta úrslitið hjá felagnum nakrantíð, til lukku við tí, Undrið.

Í hinum endanum var “kappingin” um niðastu plássini hørð til tað seinasta – ella rættari sagt um næstniðasta plássið, ti niðasta plássið sat ÍF tungt á mestsum alla kappingina. Tá avtornaði, gjørdust teir triðbestu hjá NSÍ svartiper, tá teir í seinasta dystinum á heimavølli bara fingu javnleik móti 07 Vestur, sum endaði triðniðast.

Tað er tó mangt, ið bendir á, at niðastu plássini í 2. deild í ár verða bílig, og lítið og einki bendir á, at NSÍ noyðist at flyta niður. Tí um hugt verður eftir støðuni í Finalubólkinum 3. deild í løtuni, so sæst, at trý tey fremstu liðini har eru: Kía, Víkingur og 07 Vestur. Einki av hesum trimum kunnu flyta upp, tí tey eru longu umboðað í 2. deild. Einasta ivamálið kann vera, um EB/Streymur á 4. plássi í 3. deild klárar at ota seg longur upp, tí so flyta teir upp í 2. deild, meðan ÍF noyðist niður í 3. deild. FaroeSoccer fylgir gongdini.

Toppskorari í 2. deild í ár gjørdist liðskiparin (og verjuleikarin!), hjá Víkingi, Andras Dalbø, við sínum 17 málum, men tað hevur tíverri víst seg ómøguligt at fáa eina andlitsmynd av honum. Eingin í Víkingi sum kennir eitt kall? :-)

Øll hagtølini um 2. deild finnast her.