AB roynir at hanga í

Fult umfar var í kvinnudeildini hetta vikuskiftið. Á Skála vann KÍ ein 1-0 sigur, har tær skoraðu í tíðini, sum dómarin hevði lagt afturat. Í Gøtu vann AB sín fyrsta sigur nakrantíð, og í Steymnesi leiktu botnliðini javnt.



Skála - KÍ
Flestu eyguni vóru vend ímóti dystinum á Skála, har Skála tók ímóti KÍ. Tað eydnaðist jú Skála at leika javnt ímóti KÍ í Klaksvík, og tí vóru fólk flest spent uppá, um Skála fór at klára at vinna á heimavølli.

Dysturin í Klaksvík var javnur og spennandi, har bæði liðini høvdu nógvar kjansir, men soleiðis var ikki á Skála. KÍ setti seg á dystin beinanvegin og trýsti Skála heilt aftur og høvdu nógvar kjansir at leggja seg á odda, men tær høvdu stórar trupuleikar við at fáa bóltin tað seinasta pettið inn um strikuna. 

Tað var so at siga einvegis ferðsla allan dystin, men trupult var hjá KÍ-kvinnunum at spæla seg í gjøgnum tøttu verjuna hjá Skála. Sum tíðin gekk, so vóru tað nógv, sum væntaðu, at Skála fór aftur at taka stig frá KÍ, men KÍ-kvinnurnar vildu tað øðrvísi. Í einari síðstu roynd at fáa mál sparkaði Ragna ein bólt úr verjuni og fram í brotsteigin hjá Skála, og frammanfyri málið fekk Rannvá órógva málverjan og verjuleikara hjá Skála so mikið, at bólturin fór uppum tær og í málið. Meir hendi ikki í dystinum, og KÍ-kvinnurnar fingu skavað sær trý stig við heimaftur.

Víkingur - AB
Í Gøtu leiktu Víkingur og AB. Undan dystinum hevði AB ongantíð vunnið í Gøtu, men hesaferð var eingin ivi um úrslitið. AB var nógv betur frá byrjan til endan, og tær kundu gott havt vunnið nógv meira, um tær vóru neyvari frammanfyri málinum. A-landsliðsleikarin, Olga Kristina Hansen, ið gjørdi hattrick í dystinum, legði AB á odda, tá hálvur tími var leiktur, og beint fyri hálvleik gjørdi hon tað til 2-0. 

Í seinna hálvleiki kom Víkingur eitt sindur betur við í dystin, men komu tó afturum 3-0, tá tær gjørdu brotsspark. Málverjin Simona Heinesen varð send fram at skjóta, og hon sveik ikki álitið og skoraði trygt.

Eitt mál kom afturat í dystinum, og var tað aftur Olga Kristina, sum skoraði. AB leikti tó seinastu tíggju minuttirnar við 10 leikarum, tá Valgerð Andreasen bleiv rikin av vøllinum fyri sítt næsta gula kort.

EB/Streymur - MB
Í Streymnesi leiktu botnliðini EB/Streymur og MB. Fyrr í ár leiktu hesi bæði liðini javnleik 1-1, og soleiðis varð eisini hesuferð. MB fekk eina dreymabyrjan, tá Margit Magnusdóttir legði MB á odda í 5. minutti. Hesa leiðslu hildu tær til tveir minuttir vóru eftir til hálvleik, tá Íðunn Magnussen javnaði fyri EB/Streym.

Tað komu ikki fleiri mál í dystinum, hóast liðini høvdu møguleikar til tað. EB/Streymur eru nokk betur nøgdar við tað stigið enn MB, tí um MB ætlar sær at verða verandi í deildi, so eru tað dystir í móti EB/Streymi, har tær fyrst og fremst skulu vinna.

Komandi vikuskiftið eru seinnu hálvfinalurnar á skránni, og tískil eru ongir dystir í landskappingini.