Español English Føroyskt

Søgan


Bjarni átti uppskotið

Tað var havnarmaðurin, Bjarni Joensen, núverandi eigarin av Fótbúna í Havn (men sum tá búi í Danmark), sum einaferð í 2004 ella 2005 kom við hugskotinum um, at tað kundi verið stuttligt at gjørt ein stóran føroyskan fótbóltsdátugrunn. Bjarni visti, at Marni longu hevði hendan skrásetingarhugin frá fyrst í 1990unum, tá teir sótu saman í starvsnevndini hjá HB nøkur ár. Tá gjørdi Bjarni ein dátugrunn at halda skil á limum og limagjaldi fyri HB, sum Marni samstundis kundi brúka til at innlesa dómaraseðlar í og gera hagtøl uppá leikarar felagsins. Seinastu mongu árini er tó einki innlisið í dátugrunnin hjá HB.

Hesuferð snúi tað seg tó um eina munandi størri verkætlan, og greitt var beinanvegin, at onkur "super"forritari mátti inn í myndina. Hetta bleiv til runavíkingin og teldusnillingin, Eyðun Lamhauge, sum Bjarni kendi væl frá starvstíð teirra saman í Statoil. Bjarni var sannførdur um, at Eyðun var rætti maðurin, og rætt fekk hann, hóast Bjarni sjálvur av ymsum orsøkum ikki bleiv serliga drúgvur í samstarvinum um FaroeSoccer. Hann hevur tó meira enn so  verið hentur at heitt á viðhvørt í sambandi við verkætlan okkara. 

Sum eitt lítið kuriosum kann nevnast, at hetta er tann sami Bjarni, sum var liðleiðari hjá landsliðnum, tá vit vunnu søguliga sigurin í Landskrona á sinni. So áhuganum fyri fótbólti bilar einki, tað kunnu HB og Liverpool skriva undir uppá! :-)

Ein botnur kom í arbeiðið seint í 2006, tá Marni fekk sær farloyvi frá arbeiðsplássi sínum í 2-3 mánaðir til burturav at avrita og skráseta dómaraseðlar hjá FSF í dátugrunnin. Hetta munaði veruliga og hjálpti eisini væl um hugin at halda fram.

Hesa seinastu tíðina, tá verkætlanin nærkaðist netinum, kom tann "driftigi" fuglfirðingurin, Rógvi Róin, uppí at samskipa tað heila eitt sindur betri, og ætlandi verður Rógvi eisini ein partur av FaroeSoccer frameftir onkursvegna.

Marni hevði alla tíðina eina rímuliga greiða ætlan við verkætlanini, sum hann sjálvur nokkso tíðliga byrjaði at nevna FaroeSoccer, og arbeitt hevur at kalla alla tíðina verið eftir hesum leistinum. At verkætlanin so kanska gjørdist størri og (munandi) drúgvari enn ætlað og væntað, er so tað, tað er. Lítið av peningi hevur tíverri verið at rutta við, og onkutíð var kanska eitt sindur baldrut á leiðini.

Men nú vit hava nátt fyribilsmálinum, sum var at koma á netið við tíðarskeiðinum 1991 til í dag, má sigast, at tað var tað heila vert. Vit hava "plágað" nógv fólk á leiðini, ikki bara hvønn annan, men eisini Bjarna, FSF, dómarar, leikarar, venjarar, felagsfólk, you name it - men fyrst og ikki minst hava familjurnar hildið okkum út, og tað takka vit fyri, tí uttan stuðul heimanífrá gerst sum kunnugt sjáldan nakað.

Í FSF vóru tað serliga nú fyrrverandi forsetin, Høgni í Stórustovu, og fyrrverandi nevndarlimurin, Sveinur Tróndarson, sum sóu møguleikarnar við FaroeSoccer og stuðlaðu undir verkætlan okkara frá byrjan, og takk fái teir fyri tað. 

Vit takka eisini øllum fíggjarstuðlum okkara hesi árini, serliga Eik-grunninum og FSF, men eisini Sosialurin og Dimmalætting og fleiri av fótbóltsfeløgunum sóu tíbetur tað skilagóða í hesi verkætlanini. Annars hava vit eisini fingið moralskan stuðul og praktiska hjálp frá ørgrynnu av privatpersónum, og hesum takka vit eisini mirðiliga - tit vita, hvørji tit eru. 

Kunning um dagføring av dystum á FaroeSoccer
Til allar brúkarar okkara

Við tað, at FSF nú hevur sína egnu elektronisku skrásetingarskipan, eru eingir fysiskir dómaraseðlar longur til kappingarnar, sum FaroeSoccer skrásetur:

FaroeSoccer kann tí ikki leggja fakta frá dystunum út, áðrenn feløgini og dómararnir hava skrásett hesi í skipanina hjá FSF. Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.

Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2018