Español English Føroyskt

Dómaraseðlar


Broytingar gjøgnum tíðirnar
Grundarlagið undir FaroeSoccer eru almennu dómaraseðlarnir, sum eru til skjals hjá Fótbóltsambandinum. Hesir eru og verða avritaðir av FaroeSoccer og síðani innlisnir í dátugrunn okkara. Hetta er sjálvsagt ikki løtuverk - óteljandi tímar yvir fleiri ár, og enn er nakað eftir á mál.

Dómaraseðlarnir hava verið ymiskir í skapi og vavi gjøgnum tíðirnar, og hetta merkir eisini skrásetingina hjá FaroeSoccer. Nøkur dømi um ymsu dómaraseðlarnar síggjast her niðanfyri sum pdf-fílur.

Tíðarskeið: 1948-1971 | 1972-1990 | 1991-1993 | 1993-2001 | 2001-2008 | 2008-dd

Dómaraseðil til lægru deildirnar (frá 2009)
 
Ikki fyrrenn miðskeiðis í 1993 kann man siga, at dómaraseðilin gerst nóg góður til veruliga hagtalsskráseting við eftirtíðini í huga. Her verður serliga hugsað um, at málskjúttarnir skulu upplýsast í røttu raðfylgjuni, og minutttølini fyri ymsu hendingunum í dystinum gerst eitt krav.

Ein týdningarmikil broyting til tað betra hendir tó eisini í 1991, tí her verður nú upplýst, hvørjir leikarar byrja inni, og hvørjir byrja úti. Hendan kunningin manglar á dómaraseðlunum fyri alt tíðarskeiðið 1972-1990. 

Fyrsti dómaraseðilin, FaroeSoccer veit um, er frá 1948, hann er í tveimum eintøkum, sum bæði skuldu latast FSF (ÍSF). Hesin seðilin er sum heild tann sami, sum brúktur verður heilt til 1971. Hesin upplýsir bara dagfesting, úrslit, leikarar og dómara. Allarhelst hevur hesin seðilin eisini verði brúktur í 1942-1947 ella ein part av hesum tíðarskeiði, men tað kann ikki sigast við vissu, tí eingin seðil er til skjals frá hesi tíðini.

FSF brúkar bara ein og sama dómaraseðil til allar deildir/kappingar heilt upp til 2007. Í 2008 ger FSF ein heilt nýggjan og øðrvísi dómaraseðil til bestu og næstbestu mannfólkadeildina. Og í 2009 ger FSF so eisini nakrar broytingar til tað betra við dómaraseðilin til hina deildirnar. Upplýsast kann, at FaroeSoccer samstarvaði við FSF um báðar hesar dómaraseðlarnar.

Tað er týðiligt, at hvørja ferð FSF hevur gjørt nýggjar tillagingar til dómaraseðilin, so gongur ein ávís tíð, áðrenn dómararnir hava vant seg til hetta. Tillagingartíðin er oftast longri í lægru deildunum, sum stundum hava havt - og framvegis onkutíð hava - ov tilvildarligar dómarar.

Dómaraseðilin, sum FSF hevur brúkt síðani 1993 við smærri tillagingum stendur lítið aftanfyri dómaraseðlarnar í grannalondunum, í nøkrum førum er hann uttan iva betri, serstakliga í sambandi við málskjúttarnar. Vónandi fer tað tó at ganga tann vegin í hesum KT-tíðum, at dómaraseðlar fara at verða lættari og tryggari at útfylla beinleiðis gjøgnum internetið, hetta sum m.a. verður gjørt í Íslandi.

Dómaraseðlarnir eru eyðsæð ikki betri enn dómararnir og feløgini, sum skulu fylla teir út. Seinastu árini hevur FSF veruliga tikið sær um reiggj at útbúgva nýggjar dómarar og fáa støðið upp kring dómaraseðlarnar, og vónandi fer tilvitanin um FaroeSoccer at bøta enn meira um støðuna.


 

Sendið okkum dómaraseðlarnar
Til feløg og dómarar
Minnist til at senda okkum dómaraseðilin beint eftir loknan dyst í hesum kappingum:
Effodeildin, 1. deild menn, 2. deild menn, U18 dreingir, 1. deild kvinnur og Steypakappingarnar M/K.
Seðlarnir skulu sendast til faks 320516 ella tpost fotboltshagtol@gmail.com. Er nakar trupulleiki ella okkurt at spyrja um, so ringið 320515/520515.
Samstarvsfelagar
2010-2014