Espa�ol English F�royskt

Skrásetingin


Hvussu og hvat verður skrásett
Alt eftir hvussu neyvur og álítandi man vil vera, so eru fleiri mátar at skráseta. Men tá endamálið hjá FaroeSoccer júst er at vera neyvt og álítandi, so er eyðsæð, at vit ikki farnir upp um garðin, har hann er lægstur – heldur tvørturímóti.

Reint tekniskt – alt eftir hvørjar upplýsingar eru á einum dómaraseðli, og hvørjar reglur hava verið galdandi gjøgnum tíðirnar í ymsu kappingunum – so hevur tað verið eitt hav av ymsum tingum at gera av og taka støðu til. Í fleiri førum eru slóðbrótandi og ótraditionellar loysnir valdar – ikki minst í sambandi við eldru dómaraseðlarnar.

At skrásetingin í summum førum ikki er nøktandi kemst í allarflestu førum av, at ongar ella bara mangulfullar keldur hava verið tøkar. Feilskrásetingar (hetta er jú at kalla alt manuelt arbeiði!) tekur FaroeSoccer upp á sín kappa, og tær verða rættaðar beinanvegin, so hvørt vit detta á tær ella verða gjørdir varugur við tær.

FaroeSoccer skrásetur bara dystir og leikarar í føroyskum kappingum og kappingar, har føroysk felagslið og landslið luttaka. Undantakið eru almennir altjóða landsdystir ella felagsdystir við føroyskum dómarum ella eygleiðarum.

Tá føroysk lið leika ímóti útlendskum liðum, verða útlendsku leikaranøvnini mest møguligt upplýst, men hesi verða ikki stovnaði í dátugrunninum, hóast møguligt er at leita uppá tey.

Yvirorðnað skrásetir FaroeSoccer hesar kappingar:
Menn: Tríggjar ovastu mannfólkadeildirnar, almennar steypakappingar, Evropa Cup og landsliðini.
Kvinnur: Bestu deildina, steypakappingina, Evropa Cup og landsliðini.

Í sambandi við landsliðini eru í fyrsta umfari bara almennu dystirnir síðani limaskapin í FIFA og UEFA skrásettir. Men ætlanin er sjálvandi eisini at skráseta óalmennu dystirnar.

Í verandi løtu (mars 2010) eru omanfyri 13.000 dystir í dátagrunninum hjá FaroeSoccer. Av hesum eru eini 9.000 innlisnir við fullum data (leikarar, dómarar, málskjuttar, kort, minuttir osfr.), meðan restin bara er innlisin við úrslitum.

FaroeSoccer hevur havt fleiri fyrimyndir í sambandi við skrásetingina. Vit hava funnið inspiratión á nógvum síðum á netinum, og onkrar av hesum síðum hava eisini beinleiðis veitt okkum eina hjálpandi hond, og hetta fegnast vit sjálvsagt um og takka fyri.

Kunning um dagføring av dystum á FaroeSoccer
Til allar brúkarar okkara

Allir dómaraseðlar á FaroeSoccer frá heimligu kappingunum verða vístir við loyvi frá FSF. Síðani 2017 eru allir dómaraseðlar skrásettir elektroniskt í Comet-skipanini hjá FSF, sum FaroeSoccer hevur atgongd til.

Hetta merkir, at tað ber illa til hjá FaroeSoccer at leggja øll fakta frá einum dysti út, áðrenn dómarin er liðugur at skráseta dystin í Comet, og tað hendir tíverri verri enn so altíð beint eftir leiklok. 

Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.


Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í Comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2019