B36 nærkast toppinum

Tað er ikki tað stóra at siga um EB/Streym sum gongur frá sigri til sigurs, allir 11 dystirnir eru vunnir higartil (tvs. móti øllum hinum 9 liðunum), og fleiri av teimum sera trygt eisini, t.d. eru seinastu tríggir dystirnir vunnir við 17-0(!), 5-0 og 6-1.Vinna teir eisini komandi dystin móti B36 í Gundadali, er ilt at síggja, at teir fara at tapa nakran dyst í ár yvirhøvur. Teir eru í løtuni 10 stig frammanftyri Undrið á 2. plássi.

Eftir at Undrið vann ein sera góðan 2-1 sigur á B36 í 9. umfari, er stígur komin í. Fyrst tveittu teir ein sigur burtur í yvirtíðini á Toftum móti teimum næstbestu hjá B68, og síðani taptu teir Í Gundadali fyri teimum triðbestu Víkingunum. Hetta var ein uppiborin 2-1 stríðssigur til Víkingar, sum bæði komu afturút og fingu ein mann útvístan, men allíkavæl vendu dystinum til allarseinast. Víkingar liggja í løtuni á einum flottum 4. plássi og snodda til bronsuna.

Í B36 hava tey sum heild ikki verið nøgd við gongdina hjá 2. deild í ár, og tí var avgjørt at skifta venjara eftir 8. umfar. Hetta vóru teir tó at síggja til ikki klárir til í 9. umfari, tá teir taptu toppdystin fyri Undrinum. Men síðani hevur “venjaraeffektin” sligið til, og B36 hevur seinastu tvey umførini hálað 5 stig inn á Undrið á 2. plássi, so munurin nú er minkaður niður í tvey stig. Vinnur B36 í næsta umfari móti EB/Streymi, so skal Undrið nokk av álvara ansa sær.

Í hinum endanum í deildini vunnu teir næstbestu hjá ÍF í 10. umfari sín fyrsta dyst eftir 42 royndir! Heimasíðan Bolt.fo hevði eina grein um hetta herfyri, hon kann lesast her. Men hesin sigurin móti Víkingi fekk ikki ÍF burtur av niðasta plássi, og teir eru enn sum áður favorittar at flyta niður. Toftamenn hava skavað nøkur stig saman í seinastuni, og teir eru nú komnir framum teir triðbestu hjá NSÍ, sum eru dotnir niður um strikuna. Men stutt er upp til liðini beint omanfyri.

Besti málskjúttin í 2. deild hevur skotið 14 mál og spælir við EB/Streymi. Hann eitur Jónstein Magnussen, og hann gørdi eitt ordans hál í 9. umfari við sínum fýra málum í 17-0 sigrinum móti ÍF, umframt at hann skoraði hatrikk í bæði 7. og 8. umfari. Beint nú er ikki nógv, ið bendir á, at hann fer at verða tikin í ár.

12. umfar í 2. deild verður 15. og 16. juni, og spælt verður soleiðis:
B68 II - NSÍ III
Víkingur III - KÍ III
ÍF II - Undrið
AB II - 07 Vestur II
B36 II - EB/Streymur II
Klokkutíðir koma seinni.

Øll hagtølini um 2. deild síggjast her.