Venjarar stýra Giza/Hoyvík

Tíðindaskriv frá Giza/Hoyvík

Leygardagin, 7. februar, var árligi aðalfundur felagsins, og hetta man vera ein tann mest aktivasti fundurin nakrantíð.

Fyrst og fremst vóru boð frá formanninum Fróða Danielsen, at hann ikki stillaði upp aftur. Somuleiðis ljóðaði frá hinum limunum, at teir heldur ikki stillaðu upp. Ronni á Krákusteini og Bárður í Gong, sum vóru valdir á eykaaðalfundi herfyri, vóru sinnaðir at halda fram, og tí manglaðu 3 limir at manna nevndina.

Teir trýggir, sum ístaðin komu í nevndina, vóru Frankie Jensen, Kenneth Hovgaard Djurhuus og Jógvan Sólheim Heinesen. Tað sermerkta við hesar 5 nýggju limirnar var, at allir vóru venjarar á ymiskum liðum. Ronni og Bárður hava hvør sítt 3.deildarlið, Jógvan er høvuðsungdómsvenjari og venjari hjá kvinnunum og til seinast Frankie og Kenneth, sum hava ábyrgdina av 2.deild.
Hóast man kann freistast til at hugsa, at hetta kann geva trupulleikar í ymiskum støðum, so er júst tað faktum, at venjarir nú reka felagið ein upplagdur møguleiki at fáa nevnd, venjarar og leikarar í tættari samstarv. Nakað sum kanska hevur verið saknað!

Nevndin skipaði seg sum fylgjandi:
Kenneth Hovgaard Djurhuus, Formaður
Ronni á Krákusteini, Næstformaður
Bárður í Gong, Kassameistari
Jógvan Sólheim Heinesen, Skrivari
Frankie Jensen, Nevndarlimur

Gamli kenningurin Sunnleif Jacobsen játtaði seg somuleiðis at taka eitt tørn sum tiltakslimur.

Framtíðarætlanir!

Ongin loyna er í tí faktum, at felagið er sera tengt at komandi vøllinum í Hoyvík. Navnakapping, kunning til Hoyvíkina og øll tann fyrireiking, sum skal til at flyta felagið niðan til Hoyvíkar, er drúgv. Tí fegnast nýggja nevndin um arbeiðið hjá undanfarnu nevnd, sum í samstarv við Tórshavnar Kommunu hava fingið vøllin í Hoyvík á fíggjarætlan. Spakin verður settur í fyrsta dagin, og tá er felagið og nýggja nevndin klár at taka Hoyvíkina við í framtíðarætlanir felagsins.

Sjálvandi hevur Hoyvíkin eitt felag, og nýggja nevndin ivast ikki í, at felagið hevur potentialið at gerast eitt tað størsta felagið í Føroyum.

Nýggi formaðurin, Kenneth Hovgaard Djurhuus, er eisini sannførdur um, at vøllurin fer at skumpa felagið skjótt á røttu kós: “ Vit vita hvussu hart Tórshavnar Kommuna hevur arbeitt fyri vøllin, og vit eru nú komin so mikið langt, at spakin verður settur í fyrsta dagin. Hetta fer endiliga at geva okkum høvið til at fáa Hoyvíkina við í framtíðarætlanir felagsins. Felagið hevur í dag ikki nógvar møguleikar til ungdómsfótbólt, men vit royna at gera okkum galdandi, og tí fyriskipa vit aftur í ár ungdómsfótbólt á sparkivølli í Hoyvík. Somuleiðis hava vit í ár sett Jógvan Sólheim Heinesen sum høvuðsungdómsvenjari, nú prógvini eisini standa í mát við dagsins krøv. So vit vóna inniliga, at hoyvíkingar taka væl ímóti okkum, tí fyri okkum er tað sum at flyta heim.”

Við nýggja kappingarárinum fyri framman eru aftur í ár fleiri lið tilmeldaði. Vónin er í ár eins og í fjør at flyta upp úr 2.deild í 1.deild, men hesuferð eru vónirnar kanska enn meira bjartskygdar. Við Leivur Holm Joensen aftur og stórt sæð somu leikarar sum í fjør, umframt nakrar nýggjar aftrat, so er samanhaldið longu tað sterkari enn byrjanin í fjør. Úrslitini í vinardystum inntil víðari eru eisini góð, men einki er at ivast í, at arbeiðshandskarnir skulu á, tí í ár skal tað vera!

Spennandi verður undir øllum umstøðum at fylgja við øllum kappingum, nevndarvirkseminum, vøllinum í Hoyvík og annars alt felagið í sínari heild - Kappingaárið 2015 er av sonnum eitt lagnuár!

Og við teimum orðunum vil Giza Hoyvík ynskja øllum fótbóltsfjepparum eitt framúr gott kappingarár og bestu eydnu!


Nýggja nevndin hjá Giza/Hoyvík: frá vinstru: Jógvan Sólheim Heinesen, Bárður í Gong, Kenneth Hovgaard Djurhuus, Ronni á Krákusteini og Frankie Jensen. Mynd: Giza/Hoyvík.