Adidas Summar Cup

Stór føroysk summar fótbóltskapping!

Leygardagin 12. juli 2014 verður Adidas Summar Cup á fyrsta sinni.

Vit kenna øll til Dana Cup, Limfjord Cup, Partille Cup og nógvar aðrar kappingar, ið verða fyriskipaðar uttanlands hvørt summar. Túsundtals av føroyskum ungdómi hevur luttikið í hesum kappingum gjøgnum árini. Nú hava B36 og Thomas Dam Intersport tikið stig til at fyriskipa eina føroyska summar fótbóltskapping, ið hevur fingið navnið Adidas Summar Cup.

Fyriskipararnir halda tað vera harmiligt, at føroyski barna- og ungdómsfótbóltur liggur stillur stóran part av summarhálvuni, tá veðrið og umstøðurnar til fótbólt eru av tí besta. Ætlanin er tí, at hetta skal gerast eitt afturvendandi tiltak, ið skal mennast og gerast størri ár um ár.

Kappingin skal ikki avloysa uttanlandsferðirnar, men skal hinvegin vera eitt íkast til hesar. Og hetta verður ein kapping, ið feløgini hava møguleika at fara til ár um ár. Vónandi kann kappingin vera við til at knýta vinabond tvørturum feløgini.

Kappingin verður fyri aldursbólkarnar U6, U8, U10, U12, U14 og U16, og verður sjálvandi fyri bæði gentur og dreingir. Her er vert at leggja til merkis, at ein kapping verður fyri U6, ið vanliga luttekur sum partur av U8.

Aftrat sjálvari fótbóltskappingini verður eisini skipað fyri fleiri stuttligum tiltøkum rundan um vøllin fyri øllum luttakarum, so hetta verður ein veruligur fótbólts- og ítróttardagur í Gundadali.

Allir luttakarar fáa eina t-shirt, liðmynd og eitt luttøkuskjal sum minni um kappingina. Heiðursmerki verða til vinnararnar, meðan smærri vinningar verða lætnir til m.a. tað liðið, ið skorar flest mál.

Vónandi verður stórur áhugi fyri kappingini. Meira verður at frætta um kappingina komandi dagarnar, har eisini verður kunnað nærri um tilmelding.