Español English Føroyskt

Skála aftur í 1. deild

týsdagur 21. september 2010
Niðurtúrurin hjá Skála, sum byrjaði í 2008, tá teir upp á bara tvey ár fóru úr bestu deildini og endaðu í 2. deild, steðgaði væl og virðiliga í vikuskiftinum, tá teir tryggjaðu sær gullið í 2. deild.

2. deild - 18. (seinasta) umfar:

Skála - MB  7-0
B36 - FC Hoyvík  4-1
07 Vestur - TB  6-0
FC Suðuroy - KÍ  útsettur
Víkingur - ÍF  2-2

Trýst her fyri at síggja fleiri hagtøl frá dystunum, yvirlit yvir støðuna, málskjúttar og kort


Samanumtikið
Seinasta umfarið í 2. deild broytti einki í upp- og niðurflytingarstríðnum. Staðfestast kann bara, at Skála helt fast um oddasessin og tískil flytir upp í 1. deild komandi ár eftir eitt-ára støðg í 2. deild. FC Hoyvík helt fast um 2. plássið hóast tap fyri B36, sum ikki kundi brúka hendan sigurin til nakað, tí 07 Vestur helt fast um 3. plássið og uppflytingarmøguleikan við einum tryggum heimasigri móti TB.

Soleiðis sum (ringa) gongdin hjá AB hevur verið seinastu tíðina - bæði í Vodafonedeildini og í 1. deild, og soleiðis um 07 Vestur hóreiggjar sær í 1. deild, so er nógv, ið bendir á, at  3. plássið hjá 07 Vestur í 2. deild fer at bera uppflyting við sær - eisini líkamikið hvussu FC Hoyvík stendur seg í 1. deild.

Umframt bronsurnar og møguliga uppflyting kann 07 Vestur eisini fegnast um at eiga toppskjúttan í deildini í Karl Jóhan Djurhuus. Karl Jóhan skoraði heili 18 mál í ár, og hann var eisini toppskjútti í fjør við 16 málum. Sindur løgið at hann ikki fær onkrar minuttir á 1. liðnum, sum tó ongar beinleiðis skoringstrupulleikar hevur skal sigast.

Í botninum er endaliga staðfest, at Víkingur og MB fara niður, hóast MB sprellaði eitt sindur móti endanum. FaroeSoccer harmast um, at MB fer niður í 3. deild við sínum besta liði og harvið dettur útum skráseting okkara komandi ár (um ikki okkurt óvæntað hendir við samstarvinum við FSF). Hinvegin taka vit hattin av fyri Víkingi - sum eisini hevur lið í Vodafonedeildini og 1. deild - at teir hava møtt upp til allar dystirnar í ár og enntá hava skavað sær nøkur stig saman eisini. Víkingur hevði eisini trý lið við í 3. deild (hóast bara tvey leiktu), ótrúligt! 

Skála aftur í 1. deild
Fegnir skálamenn og vinnarar av 2. deild 2010 eftir seinasta dystin á Skála móti MB. Venjarar í ár vóru Alexandur Johansen og Eliesar Olsen (Mynd: Asbjørn Mikkelsen).


Skála og MB vóru einastu feløgini, sum høvdu sítt besta lið í 2. deild í ár, og tey fóru hvør sín veg úr deildini, tá avtornaði.

Skála skoraði flest mál og lat fægst fara inn (67-17). Ringasta álopið hevði Víkingur við sínum 21 málum, og ringastu verjuna hevði ÍF, sum lat heili 62 mál fara inn í ár.

Skála brúkti fægst leikarar í 2. deild, 32 mans komu á vøllin í appelsingulu troyggjuni í ár. Hetta er tó ikki nakað serliga lágt tal allíkavæl, men sigur nokk bara nakað um støðið og áhugan í 2. deild.

Við sínum 46 leikarum brúkti FC Suðuroy flestar leikarar í 2. deild í ár, men FC Hoyvík var beint í hølinum við 45, KÍ við 44 og ÍF við 43.

Tveir útsettir dystir skulu tó avgreiðast afturat í 2. deild: MB - FC Suðuroy og FC Suðuroy - KÍ.

Tað er nú greitt, at Undrið FF flytir upp úr 3. deild saman við antin NSÍ ella Royn.

FaroeSoccer ynskir Skála og Undrinum hjartaliga tillukku við uppflytingini.


Kunning um dagføring av dystum á FaroeSoccer
Til allar brúkarar okkara

Við tað, at FSF nú hevur sína egnu elektronisku skrásetingarskipan, eru eingir fysiskir dómaraseðlar longur til kappingarnar, sum FaroeSoccer skrásetur:

FaroeSoccer kann tí ikki leggja fakta frá dystunum út, áðrenn feløgini og dómararnir hava skrásett hesi í skipanina hjá FSF. Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.

Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2018