FSF stuðlar framvegis FaroeSoccer

Nýggja skrásetingarskipanin (og dátugrunnurin) hjá FSF nevnd Comet, sum er freimleidd av kroatum, stendur í hesum døgum sína roynd, nú pappírsdómaraseðilin er burturbeindur, og elektroniski dómaraseðilin hevur loyst av.

Nú eru tað feløgini sjálvi og dómararnir (og FSF í síðsta enda), ið hava alla ábyrgd av skrásetingini. FaroeSoccer letur ikki longur hagtøl til FSF, tvs. kappingarnar á fsf.fo hava ikki hagtøl frá FaroeSoccer, men frá Comet-skipanini.

FSF manglar tó enn eina síðu ella eina skipan at kunna vísa dómaraeðlarnar á netinum fyri øll at fylgja við í eins og FaroeSoccer, men tað fer nokk at koma. Comet-skipanin er bert fyri tey, ið hava atgongd (loyniorð) til skipanina, og tað eru í løtuni útvald fólk í feløgunum og FSF.

FSF vil tó fegið, at hagtølini verða víst á netinum hjá ØLLUM at síggja og brúka, og tí hevur FaroeSoccer fingið atgongd til Comet-skipanina at lesa dómaraseðlarnar av og skráseta teir á FaroeSoccer sum vanligt. FaroeSoccer hevur eisini atgongd at síggja øll leikaranøvn á Comet, tað er neyðugt, nú gamli leikaralistin er tikin av fsf.fo.

FSF vil eisini fegið, at FaroeSoccer heldur fram við sínari skráseting, tí í verandi løtu hevur FSF ongar ítøkiligar ætlanir um at fara aftur í tíðina við skráseting síni, so í so máta hevur tað týdning, at allir upplýsingar eru tøkir á einum staði. FaroeSoccer er eisini einasta staðið á netinum, har ALLIR landsdystir okkara gjøgnum tíðirnar eru samlaðir.

FSF metir FaroeSoccer sum ein góðan viðleikara framhaldandi, og tí er man sinnaður at stuðla verkætlan okkara fíggjarliga í 2017, ikki minst nú FaroeSoccer stendur fyri so nógvum og stórum broytingum/avbjóðingum, sum kunnu tyngja um fíggjarliga.  Hetta eru vit sera takksamir fyri, og eins og áður kunnu vit bara lova, at okkara partur fer ikki at liggja eftir.

Gott kappingarár øll somul.

Vit spæla saman!