FaroeSoccer fer í ár at royna at gera eitt sindur burturúr teimum kappingunum, sum vanliga lítla og onga umrøðu fáa í fjølmiðlunum, eitt nú kvinnurnar og lægru mannfólkadeildirnar. Ætlanin er ikki at fara niður í smálutir ella at hava (langar) dystarfrágreiðingar, men meira at taka samanum gongdina. Vit fáa at síggja, hvat tíðin og orkan verður til. Hevur nakar hug at hjálpa okkum við hesum – ikki minst í sambandi við kvinnufótbóltin, so er bara at lata okkum frætta.
B36 og AB/B71 byrja kappingarárið við tøgn í ein minutt fyri at minnast gamla B36-formannin, Kjartan Mohr, sum doyði í vetur. Mynd: FaroeSoccer.
Besta kvinnudeildin er økt við einum liði í ár, nú nýggja samstarvið millum AB og B71 heldur seg til. Hetta er eitt sera ungt lið, har bulurin er U17-liðið hjá B71, og heimavøllurin er á Sandi. AB og B71 samstarva eisini um U17-liðið, og har er heimavøllurin á Argjum. Hetta er fyrstu ferð síðani 2001, at B71-kvinnurnar leika í bestu kvinnudeildini.
Hópurin hjá AB/B71-kvinnunum i ár er SERA ungur, og tær flestu hava ongar royndir at spæla á heilum vølli, og hetta sást eisini aftur í fyrsta dystinum í Gundadali móti sterka B36-liðnum. 19-0(!) er millum størstu sigrarnar – ella ósigrarnar – nakrantíð í bestu kvinnudeildini. B71-heimasíðan er als ikki bilsin av, at unga kvinnulið teirra tapti, men heldur at ósigurin varð óvæntað stórur og óneyðuga stórur.
Toftakvinnur vóru eisini ungar og spildurnýggjar í fjør, og tá vóru tær eisini fyri fýra tveysiffraðum ósigrum í landskappingini, men tær góvu tíbetur ikki upp, og B68 er við aftur í ár nógvar royndir ríkari.
Hetta var sjálvsagt ein dreymabyrjan fyri B36 – og ikki minst hjá Saritu Mariu Mittfoss (7 mál) og Áslu Johannesen (6 mál), og B36 verður uttan iva størsta hóttanin móti avgjørdu FM-favorittunum KÍ og EBS/Skála, ið sum væntað vunnu tryggar 5-málssigrar á ÍF/Víkingi og B68. Nýggi stórleikarin hjá EBS/Skála, Heidi Sevdal, fekk eina góða byrjan fyri nýggja lið sítt við tveimum málum.
Av tí at 7 lið eru við í kappingini í ár hevur eitt lið frí hvørt umfar, hesa ferð var tað HB.
16 leikarar spældu sín fyrsta dyst í bestu kvinnudeildini:
AB/B71: 11, B36: 1, B68: 0, EBS/Skála: 0, HB: 0 (ikki spælt enn), ÍF/Víkingur: 2, KÍ: 2.
Klikka á eitt lið í støðuni, so kemur tú inn a hópin higartil í ár, og leikarar við feitari skrift hava spælt sín fyrsta dyst á besta liðnum í ár.
FaroeSoccer hevur fingið nýggjar andlitsmyndir av kvinnunum hjá B36 (takk fyri tað), og sjálvir hava vit eisini tikið andlitsmyndir av kvinnunum hjá AB/B71, men tíverri hava vit ikki fingið upplýst nøvnini á teimum enn, so tær eru ikki lagdar út enn (Dagføring: myndirnar eru úti nú). Vónandi fara onnur feløg eisini at taka myndir av sínum kvinnum, serliga tey við heldur gomlum myndum.
Øll hagtølini í 1. deild kvinnur eru her.