Espa�ol English F�royskt

FSF stuðlar framvegis

mikudagur 10. apríl 2019
FSF og FaroeSoccer hava gjørt eina nýggja stuðulsavtalu fyri 2019, sum umframt vanligan fíggjarstuðul eisini fevnir um eina spennandi ætlan um at skráseta og talgilda gamlar føroyskar fótbóltsmyndir.

Fótbóltssamband Føroya hevur frá fyrsta degi stuðlað stóru verkætlanini FaroeSoccer, bæði við at lata tilfar (dómaraseðlar) og við beinleiðis fíggjarligum stuðli. Hetta samstarvið umframt góða samstarvið við dómararnar hevur verið grundarsteinurin undir hagtalsvirkseminum hjá FaroeSoccer.

Men FaroeSoccer er meira enn hagtøl. Eitt stórt og støðugt arbeiði er alla tíðina gjørt fyri at seta andlit á ymsu profilarnar á síðuni, tað veri seg leikarar, venjarar ella dómarar. Higartil eru nakað omanfyri 3.000 andlitsmyndir – av umleið 10.000(!) – á FaroeSoccer.

FaroeSoccer hevur tó áhuga fyri øðrum myndum eisini, serliga eldri liðmyndum (1942-2000), bæði tí tað er áhugavert siðsøguligt tilfar (og klípi av felagssøgu), og tí tær kunnu stuðla undir hagtølunum, og onkutíð kunnu tær siga nakað um manningar tey árini, eingin dómaraseðil ella annað info er til. Ætlanin í fyrsta umfari er at knýta eina tílíka liðmynd til ein hóp eitt ávíst ár á FaroeSoccer. Hetta krevur eitt sindur av forriting.

FaroeSoccer fer nú miðvíst undir at leita upp gamlar fótbóltsmyndir (oftast liðmyndir) kring alt landið. Eldri fótbóltsmyndir – eisini landsliðsmyndir – eru í hesum føri fyrst og fremst myndir frá tíðarskeiðnum 1942-2000, men uppaftur eldri myndir hava sjálvsagt eisini áhuga. Høvuðsendamálið er at fáa tær talgildar (skannaðar), skrásettar og goymdar trygt fyri eftirtíðina eitt stað á netinum, har lættari atgongd er til tær hjá øllum áhugaðum. Summar myndir eru kendar og eru í eitt nú eldri fótbóltsbókum og í bløðunum, men eingin skannað mynd er tøk.

Nógv tær flestu eldru (fysisku) fótbóltsmyndirnar eru privatogn og eru ikki umfataðar av nøkrum upphavsrætti, so tað skuldi ikki verið nakar trupulleiki í so máta at skanna hesar og geva øðrum atgongd til tær til seriøs endamál. Søga er altíð áhugaverd – ikki minst fótbóltssøga. Hvussu myndirnar verða goymdar, og hvusu fólk fara at fáa atgongd til hesar myndir er ikki avgjørt enn.

Tað er ikki løtuverk at leita upp nógvar av hesum gomlu myndunum, og FaroeSoccer og FSF vóna gott samstarv við fólk og feløg kring landið, so ein myndadýrgripur ikki gleppur okkum av hondum. Vit fara at seta okkum í samband við hópin av fólki, og vit vóna eisini, at fólk seta seg í samband við okkum av sínum eintingum. Vit hava sum útgangspunkt áhuga í ØLLUM gomlum fótbóltsmyndum.

Vit spæla saman!


comments powered by Disqus
Kunning um dagføring av dystum á FaroeSoccer
Til allar brúkarar okkara

Allir dómaraseðlar á FaroeSoccer frá heimligu kappingunum verða vístir við loyvi frá FSF. Síðani 2017 eru allir dómaraseðlar skrásettir elektroniskt í Comet-skipanini hjá FSF, sum FaroeSoccer hevur atgongd til.

Hetta merkir, at tað ber illa til hjá FaroeSoccer at leggja øll fakta frá einum dysti út, áðrenn dómarin er liðugur at skráseta dystin í Comet, og tað hendir tíverri verri enn so altíð beint eftir leiklok. 

Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.


Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í Comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2019