Espa�ol English F�royskt

Kappingin um kvinnusteypið broytt

sunnudagur 17. mars 2019
KVINNUSTEYPIÐ: FSF hevur broytt kappingarleistin hjá kvinnunum soleiðis, at steypakappingin nú verður leikað í tveimum innleiðandi bólkum - hetta mest tí at B68 tók seg úr kappingini í ár.

Tá B68 tók lið sítt úr kappingini og legði saman við ÍF/Víkingi, minkaði dystartalið í Betri Deildini frá 20 niður í 16. Hetta var ov lítið, og tískil var roynt at fáa vinnaran av 2. deild í fjør, 07 Vestur, at luttaka í bestu deildini í staðin. Tað vildu tær í 07 Vestur ikki, men eftir øllum at døma hava tær játtað at spæla við í steypakappingini allíkavæl.

Fyri at leggja upp fyri teimum mistu dystunum í Betri Deildini, hevur FSF so valt at geva liðunum fleiri dystir í steypakappingini í staðin, og tað er sum skilst fallið í hampuliga góða jørð hjá teimum fimm Betri-feløgunum.

Steypakappingin skal nú spælast í hesum báðum innleiðandi bólkunum við tveimum heima- og útidystum:

A) 07 Vestur, B36, KÍ
B) EBS/Skála, HB, ÍF/Víkingur/B68

Eftir hetta vera so tvær hálvfinalur (har eittarnir allarhelst leika móti tveyarunum) og so ein finala sum vanligt á Tórsvølli. Steypakappingin byrjar 26. mars, fyrra hálvfinalan er 3. juli og tann seinna 1. ella. 4. august. Finalan er ikki dagfest enn, men seinastu árini hevur hon verið seinasta viku í august ella fyrstu vikuna í september.

Fulla dystarskráin í steypakappingini sæst annars her.

Um kvinnusteypið annars kann sigast, at tað tykist eitt sindur løgið, at FSF ikki hevur eitt alment lutakast um bólkabýtið. Nú sær tað nokkso (óneyðuga) “planlagt” út við HB og KÍ í hvør sínum bólki, hvør skal siga, at hetta eru liðini, man helst sær í finaluni.

Í hesum tíðum, tá man sigur seg raðfesta kvinnufótbóltin, er eisini undarligt, at steypakappingin hjá teimum ikki kann fáa størri tign t.d. við at geva henni okkurt áhugaverdari ella meira fangandi heiti enn “Steypakappingin kvinnur”. Finst veruliga eingin sponsorur (ella onkur annar a la Løgmanssteypið), sum vil leggja navn til hesa kappingina eini 10 ár? Hevur man yvirhøvur roynt?

Og hóast Televarpið at síggja til tíverri bara hevur áhuga fyri mannfólkafótbóltinum, so átti FSF onkursvegna at stroymt dystir hjá kvinnunum eisini – í minsta lagi av og á. VIL man promovera og raðfesta kvinnufótbóltin, sum man sigur seg vilja, so heldur FaroeSoccer, at FSF má meira aktivt inn í “kampin”.

comments powered by Disqus
Kunning um dagføring av dystum á FaroeSoccer
Til allar brúkarar okkara

Allir dómaraseðlar á FaroeSoccer frá heimligu kappingunum verða vístir við loyvi frá FSF. Síðani 2017 eru allir dómaraseðlar skrásettir elektroniskt í Comet-skipanini hjá FSF, sum FaroeSoccer hevur atgongd til.

Hetta merkir, at tað ber illa til hjá FaroeSoccer at leggja øll fakta frá einum dysti út, áðrenn dómarin er liðugur at skráseta dystin í Comet, og tað hendir tíverri verri enn so altíð beint eftir leiklok. 

Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.


Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í Comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2019