Español English Føroyskt

Trý ár afturat við 2. deild

leygardagur 19. januar 2019
FaroeSoccer hevur nú skrásett árini 1987-1989 í næstbestu mannfólkadeildini – núverandi 1. deild, so tað gongur stútt og støðugt framá – ella afturá! Ætlanin er framvegis at koma longur aftur.

Sum longu nevnt í greinini 23. november í fjør 2. deild 1990 liðugt skrásett, so er trupult at skráseta eldru tíðina áðrenn 1992/1993, skilt á tann hátt at dómaraseðlarnir (teir, sum eru til) eru mangulfullir, umframt at lítið er at finna í bløðum og aðrastaðnis um dystirnar – og serstakliga um dystir í lægri deildunum.

Og tá eingir dómaraseðlar (=ongar manningar) eru til, er sjálvsagt enn verri at skráseta. Hetta ger seg tíverri galdandi fyri árini 1988 og 1989, tá eingir dómaraseðlar eru til skjals hjá FSF. 

Fyri bæði hesi árini 1988 og 1989 er tó galdandi, at alt hjá B71 er skrásett (1989 í Meistaradeildini) , tí longu tá gjørdi ein blaðungur Eli Hentze síni egnu hagtøl um B71, og síðani hevur hann latið FaroeSoccer avrit av sínum tilfari at brúka. Serstakliga heppin privat skráseting má sigast, ikki minst søguliga árið 1988, tá B71 vann 1. deild og flutti upp í bestu deildina á fyrsta sinni. 

Hagtølini hjá B71 fyri 1987 í 1. deild hevur Eli Hentze eisini latið FaroeSoccer, og tey eru góð at halda saman við dómaraseðlunum, sum ikki upplýsa stórt annað enn manning og úrslit (einki um mál og skiftingar t.d.).

Fyri 1989 er eisini galdandi, at nærum allir dómaraseðlarnir hjá næstbesta liðnum hjá HB eru goymdir í felagnum, og tískil ber til at fáa eina hampuliga góða mynd av, hvør spældi ikki bara fyri HB, men eisini fyri hini liðini í 1. deild í 1989; í hvussu so er eini 8-10 av teimum nøkulunda føstu monnunum, og tað er munandi betri enn einki.

Frá 1987 og nøkur ár aftur eru allarflestu dómaraseðlarnir í 1. deild (og 2. deild) tøkir, og hesir fara ætlandi at verða skrásettir á FaroeSoccer, so hvørt sum tíð og umstøður eru til tess,og so verður tað fráboðað her. Úrslit og støður er tó longu skrásett aftur til 1976 í bæði 1. og 2. deild.

Upprunaligu dómaraseðlarnir í 1. deild fyri 1987 (og teir fáu sum eru til frá 1989) eru viðheftir elektronisku dómaraseðlunum sum PDF-fílur.

FaroeSoccer hoyrir enn sum áður SERA fegið frá øllum brúkarum okkara, sum hava nakað at viðmerkja, ALT hevur áhuga.

comments powered by Disqus
Kunning um dagføring av dystum á FaroeSoccer
Til allar brúkarar okkara

Allir dómaraseðlar á FaroeSoccer frá heimligu kappingunum verða vístir við loyvi frá FSF. Síðani 2017 eru allir dómaraseðlar skrásettir elektroniskt í Comet-skipanini hjá FSF, sum FaroeSoccer hevur atgongd til.

Hetta merkir, at tað ber illa til hjá FaroeSoccer at leggja øll fakta frá einum dysti út, áðrenn dómarin er liðugur at skráseta dystin í Comet, og tað hendir tíverri verri enn so altíð beint eftir leiklok. 

Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.


Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í Comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2018