Español English Føroyskt

B36 “sníkt” seg upp á 2. plássið

leygardagur 7. juli 2018
SAMANUM EFTIR 13 UMFØR: Beint áðrenn menn fóru í summarfrí, spældi Undrið sær – í hvussu so er fyribils – av við 2. plássið, tá teir útsettu sín seinasta dyst móti móti KÍ, og B36 gjørdi sína skyldu og streyk upp á uppflytaraplássið fyri fyrstu ferð í ár.

Tað lækkar móti endanum í 2. deild í ár, og bara 5 umfør eru eftir. Vanliga eru kappingar komnar í helvt ella gott tað, tá summarsteðgurin er, men soleðis er ikki við 2. deild, sum bara spælir 18 umfør móti teimum 27 hjá Betri Deildini og 1. deild.

Størsti spenningurin í 2. deild er um 2. plássið, sum gevur uppflyting, og um niðastu plássini, sum (allarhelst) hava 3. deildarfótbólt við sær. Fyrstaplássið hevur EB/Streymur nevniliga sett seg tungt á at kalla frá byrjan av í ár, og tað skal ganga heilt ómetaliga illa, um teir ikki vinna deildina við sínu núverandi tryggu leiðslu. Hitt uppflytingarplássið er ein spurningur millum B36 og Undrið.

Teir næstbestu hjá B36, sum fluttu niður úr 1. deild í fjør hava havt rættuligt viðrák síðani venjaraskiftið herfyri, og teir hava nú veruliga lagt seg á uppflytingarkós. Á vegnum hava teir m.a. oyðilagt ósigraðu gongdina hjá EB/Streymi, sum teir vunnu 2-0 í Gundadali í 12. umfari, og teir eiga enn ein dyst móti Undrinum tilgóðar í 18. og seinasta umfari.

Nýggja liðið í 2. deild, Undrið, er eitt sindur steðgað upp í seinastuni, og kanska var tað líka gott fyri teir, at seinasti dysturin fyri summarsteðgin í Klaksvík móti triðbestu klaksvíkingunum varð útsettur.

Botnin manna nú teir næstbestu hjá ÍF og 07 Vestur. Vágamenn komu undir strikuna, tí teir av misgávum ikki hava verið skrásettir fyri 3 minusstig, sum teir fingu, tá teir ikki møttu upp móti B36 í 4. umfari. Men í mun til ÍF hevur 07 Vestur ikki so langt upp til hini, teir eru bara eitt stig aftanfyri teir triðbestu hjá NSÍ á 8. plássi.

Tveir dystir vórðu útsettir í 13. umfari: KÍ-Undrið og AB-ÍF, og sum skilst er eingin nýggj dagfesting sett á hesar dystir enn. Tað er løgið, at hetta framvegis kemur fyri, tá FSF hevur greiðar reglur fyri slíkum.

Í FM-bólkinum í 3. deild tykist kappingin vera millum KÍ, 07 Vestur og EB/Streym, og enda hesi trý ovast, so kann tað ávirka niðurflytingina úr 2. deild.

Seinast vit skrivaðu um toppskjúttan í 2. deild, vóru vit í so bráðir at halda, at eingin fór at taka Jónstein Magnussen hjá EB/Streymi aftur, tí tað er júst tað, sum liðskiparin hjá Víkingum, Andras Dalbø, hevur gjørt. Teir hava nú báðir 14 mál. FaroeSoccer manglar tó framvegis eina góða andlitsmynd av Andrasi (onkur? takk fyri).

14. umfar í 2. deild verður leygardagin 18. august, og spælt verður soleiðis:
Undrið - NSÍ III
ÍF II - KÍ III
B36 II - AB II
B68 II - o7 Vestur II
Víkingur III - EB/Streymur II


Øll hagtølini um 2. deild síggjast her.
 

comments powered by Disqus
Kunning um dagføring av dystum á FaroeSoccer
Til allar brúkarar okkara

Við tað, at FSF nú hevur sína egnu elektronisku skrásetingarskipan, eru eingir fysiskir dómaraseðlar longur til kappingarnar, sum FaroeSoccer skrásetur:

FaroeSoccer kann tí ikki leggja fakta frá dystunum út, áðrenn feløgini og dómararnir hava skrásett hesi í skipanina hjá FSF. Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.

Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2018