Español English Føroyskt

KÍ kendi sína vitjanartíð

mikudagur 23. mai 2018
8. UMFAR: Tvey tap fyri KÍ og HB eftir bert fýra døgum gjørdust dýr fyri EBS/Skála, sum fyribils spældi sær av við fyrstaplássið. Úrslitini í 8. umfari lagaðu seg so mikið væl fyri KÍ, at tær fyri fyrstu ferð í ár settu seg á oddasessin.

Ovastu trý liðini í Betri Deildini skiftast at vinna móti hvørjum øðrum, og tað ger kappingina sera spennandi í ár.

Hóskvøldið 17. mai varð útsetti dysturin frá 4. umfari millum KÍ og EBS/Skála loksins avgreiddur. Hendan dystin vann KÍ eitt sindur óvæntað stórt 4-0. Hóast dysturin sum heild var rættuliga javnur – hálvleiksstøðan var 1-0, so virkaðu meistararnir heldur tamari enn vanligt, og KÍarnir við liðskiparanum, Rannvá Andreassen á odda, vóru effektivar í seinna hálvleki. Í sambandi við fyrsta málið hjá KÍ í 22. minutti varð venjarin hjá EBS/Skála burturvístur fyri harðlig mótmæli.

Men 2. hvítusunnudag hevði EBS/Skála so kjansin at gera skaðan góðan aftur, tá tær møttu HB í Gundadali. Dysturin var seinkaður eina løtu, tí dómarin góðtók ikki búnan hjá EBS/Skála, sum líktist ov nógv heimaliðnum, løgið at slíkt skal koma fyri í bestu deildini. Tað endaði við, at EBS/Skála mátti spæla í nøkrum gomlum B36-troyggjum(!), og kanska motiveraði hetta HBarnar enn meira :-) 

Tá EBS/Skála legði seg á odda í 23. minutti við góðum stútara eftir horna frá toppskorara teirra, Birnu Mikkelsen, sá út til, at hetta fór at vera ein av teimum vanligu dystunum millum hesi bæði liðini, og ikki minst við fyrra dystinum í ár í huga, sum EBS/Skála vann heili 6-1. HB hevði ikki vunnið móti EBS/Skála síðani 2015. EBS/Skála spældi eisini betri enn HB og tyktist hava stýr á tí, og í HB var heilt klárt saknur í Rebekku Benbakoura á miðjuni. Men HB stríddi seg inn í dystin aftur í seinna hálvleiki, og eftir sjey minuttir spæla Milja Simonsen og Heidi Sevdal væl saman, og toppskorarin í bestu deildini fær í tveimum royndum bóltin í málið hjá landsliðsmálverjanum, Onnu Hansen. Síðani høvdu bæði liðini kjansir at taka leiðsluna, ikki minst gestirnir. Men tá EBS/Skála ikki tóku av sínum møguleikum, vórðu tær hart revsaðar í yvirtíðini, tá eitt fríspark frá Heidi Sevdal heldur heppið endar fyri føturnar á innskiftu Leu Hansen, sum skorar sítt allarhelst týdningarmesta mál higartil fyri HB. Ágangandi Lea gjørdi sum heild góðan mun fyri álopspælið hjá HB, tá hon kom inn í seinna hálvleiki.

Hóast henda góða sigurin, sum fekk HB trý stig framum EBS/Skála á stigatalvuni, so var hetta ikki nokk at røkka fyrstaplássinum, tí í Klaksvík gjørdi KÍ sum væntað sína skyldu og vann ein tryggan 6-0 sigur móti B36 í einum dysti, sum var at kalla einvegis ferðsla í 90 minuttir. Stóri sigurin fekk KÍ upp á tindin upp á betri málúrtøku enn HB. Men longu næsta umfar sunnudagin kann støðan í oddinum broytast, tá EBS/Skála tekur ímóti KÍ á heimavølli í Streymnesi, meðan HB á pappírinum hevur heldur lættari uppgávu í Gøtu móti ÍF/Víkingi.

B36 og B68 eru púra jøvn í botninum, bæði í stigum og málúrtøku, og hava ongan dyst vunnið enn. Men kanska tað verður broytt, nú liðini møtast aftur sunnudagin á Toftum. Fyrsti dysturin teirra millum í Havn í ár endaði 0-0. B68 gjørdi einki við ÍF/Víking á Toftum 2. hvítusunnudag og tapti greitt 4-0. Tað man allarhelst vera ein spurningur um tíð, nær ÍF/Víkingur fer at gera onkrum av topp 3-liðunum “fortreð”, ein nýggjur kjansur er so nú sunnudagin móti HB.

Úrslit og støða og onnur hagtøl í Betri Deildini síggjast annars HER.

9. umfar nú sunnudagin 27. mai sær soleiðis út:

EBS/Skála - KÍ kl. 18:00
ÍF/Víkingur - HB kl. 18:00
B68 - B36 kl. (ikki ásett enn)

comments powered by Disqus
Kunning um dagføring av dystum á FaroeSoccer
Til allar brúkarar okkara

Allir dómaraseðlar á FaroeSoccer frá heimligu kappingunum verða vístir við loyvi frá FSF. Síðani 2017 eru allir dómaraseðlar skrásettir elektroniskt í Comet-skipanini hjá FSF, sum FaroeSoccer hevur atgongd til.

Hetta merkir, at tað ber illa til hjá FaroeSoccer at leggja øll fakta frá einum dysti út, áðrenn dómarin er liðugur at skráseta dystin í Comet, og tað hendir tíverri verri enn so altíð beint eftir leiklok. 

Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.


Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í Comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2018