FSF hevur kolldømt 7 vøllir

Tann 26. februar í ár fingu tey sjey feløgini: AB, TB, Sumba, MB, SÍF, EB og B71 sendandi soljóðandi skriv frá kappingarnevnd FSFs:

“Kappingarnevndin hevur á fundi 19. januar 2010 havt málið um sandvøllirnar til viðgerðar.
Feløgini hava síðani 2002 regluliga fingið at vita, at flestu av hesum vøllum eru í ringum standi, og at vøllirnir eru munandi harðari at leika á, enn dagsins krøv seta.
Kappingarnevndin hevur tí gjørt av, at kappingarárið 2010 er tað seinasta, ið loyvi verður givið til at leika dystir á hesum vøllum.”

Tað var í 2002, at ein norsk fyritøka – serkøn í graslíkisvøllum – gjørdi eina meting av graslíkisvøllunum í Føroyum eftir áheitan av FSF. Longu tá var niðurstøðan, at nevndu sjey vøllur vóru ov vánaligir at leika dystir á. Síðani tá eru ongar ábøtur framdar á hesar vøllir, so eyðsæð er, at teir eru bara so mikið verri í dag – átta ár seinni.

Umframt at nevndu vøllir eru ov harðir, so eru møguliga onkrir teirra, ið ikki lúka onnur nýggjari krøv frá FSF/UEFA um uppmerking, t.d. at tekniska økið er ov lítið, og at avstandurin frá síðulinjuni út til gyrðingina er ov stuttur og líknandi.

Men nú er so ongin góða mamma longur. Hamarin er fallin, og hann er fallin hart – hóast uttan iva harðari fyri summi enn onnur. Sum FaroeSoccer metir støðuna, er hon mest akutt hjá TB og B71, hetta tí fíggjarútlitini hjá kommunum teirra eru ikki tey bestu.

Okkum kunnugt skiftir AB undirlagið í ár, og SÍF og MB hava eisini gongd í sínum málum. Vøllirnir hjá EB og Sumba hava nokk ikki so stóran týdning her og nú, tí EB/Streymur og FC Suðuroy hava aðrar vøllir tøkar.

At FSF sendir hesi kravboðini út so tíðliga í ár, man uttan iva vera tí, at feløgini skulu hava eitt skoðbráð at fara til sínar kommunur at boða frá ringu støðuni, so kommunan fær tíð at seta neyðugu upphæddina av – allarhelst eini 3-4 mió kr. – á fíggjarætlanina fyri 2011.

Men heilt grundleggjandi vil FSF sjálvsagt hava, at vøllirnir í Føroyum koma upp á eitt hægri støði og kanska gerast eitt sindur meira standardiseraðir. Vøllirnir skulu eyðsæð eisini vera tryggir og heilsugóðir at leika á. Tað er jú klárt, at tá ein vøllur ikki er nóg góður til dystir, so er hann neyvan heldur nóg góður til venjing.
 
FaroeSoccer fer at fregnast á Tvøroyri og á Sandi og møguliga aðrastaðni um, hvussu tey ætla at takla hesa støðuna til komandi ár, ella um FSF allíkavæl fer at verða kroyst til enn nøkur undantøk, tá samanum kemur.


Graslíkið á vøllinum hjá sandoyingum er ongantíð skift, síðani tað varð lagt á fyrstu ferð í 1989. Tað er altso omanfyri 20(!) ára gamalt - kvalitetur ella katastrofa?