Skála komið í gongd aftur

Í 2005 lá Skála leingi heilt óvæntað og lúrdi eftir FM-heitinum, men til endans kiksaðu hjá teimum, og B36 streyk avstað við gullinum á seinasta leikdegi. Hetta var byrjanin til endan hjá suverent besta liðnum í søgu Skála Ítróttarfelags. 

Trý ár seinni, í 2008, endaðu skálamenn á niðasta plássi í Formuladeildini og ruku tískil niður í 1. deild. Her gjørdist støðgurin tó stuttur, tí Skála hevði aftur eitt ringt ár og endaði næstniðast. Harvið stóð 2. deildarfótbóltur á skránni í 2010.

Nú pengafótbólturin er skrottaður á Skála, og bara skálamenn og strandingar manna liðið, er hugaligt at staðfesta, at liðið tykist hava fótað sær aftur. Byrjanin í ár var eitt sindur trilvandi, men seinastu umførini hevur gingið sum eftir ánni, og m.a. tveir stórsigrar hava verið við til, at teir hava hálað seg upp á annað uppflytingarplássið. Tað eru teir báðir heimamenninir, Alexandur Johansen og Eliesar Olsen, sum venja Skála í ár.

Tað er tó framvegis uppflytarin, FC Hoyvík, sum heldur væl um fyrstaplássið. Dysturin móti TB í Gundadali leygardagin varð vunnin 6-4, og serliga seinni hálvleikur var at kalla “indianarafótbóltur”, har málini skolaðu inn í báðum endum.

Liðini, sum helst fara at geva FC Hoyvík og Skála størstu mótstøðuna eru 2. lið hjá B36 og 07 Vestur við 2. liði hjá KÍ og TB sum jokarar. Bæði B36 og 07 Vestur vunnu sínar dystir trygt leygardagin, meðan KÍ og TB snávaðu.

Í botninum byrjar at síggja heldur svart út hjá MB, sum fluttu niður úr 1. deild í fjør. Eitt sindur óvæntað kanska, at teir ikki standa seg betri í 2. deild við gomlu landsliðskempuni, Jóhannis Joensen, sum venjara. At 3. lið hjá Víkingi eisini er í tungum sjógvi er ikki so nógv at undrast á – faktiskt er tað bara flott, at teir manna lið og møta upp til allar dystirnar!