FaroeSoccer er fyrst og fremst ein faktasíða ella hagtalssíða og síðani ein tíðindasíða. Í løtuni er tíðin og orkan ikki til ta nógvu greinaskrivingina, tí skráseting av hagtølum verður raðfest hægst.
Í sambandi við hagtølini hava vit fyrr heitt á feløg og einstaklingar um at hjálpa okkum við vangamyndum, so allir leikarar, venjarar og dómarar kunnu fáa eitt andlit og harvið gerst FaroeSoccer meira forkunnug og viðkomandi.
FaroeSoccer hevur líka stóran áhuga í øllum vangamyndum, vit raðfesta ikki Vodafoneleikarar hægri enn onnur, ein mynd er altíð ein mynd - eisini av 2. deildarleikarum og kvinnunum! Og vit hava eisini áhuga fyri eldri myndum (vit hava jú skrásett aftur til 1991 higartil). Er navnið at finna á FaroeSoccer yvirhøvur í sambandi við hagtøl, ja, so hava vit áhuga fyri at vísa andlitið á viðkomandi.
FaroeSoccer hevur verið eitt lítið sindur runt at taka myndir, men hetta munar tíverri so lítið. Higartil eru eini 300 myndir lagdar út, men tað er ov lítið í mun til tey gott 7.000(!) fólkini vit leita eftir.
Vit fara tí enn einaferð at heita inniliga á øll: feløg, leikarar, venjarar, dómarar, familju og vinir um at senda okkum vangamyndir (bringumyndir).
Tað er ikki neyðugt, at persónurin er í ítróttarklæðum (men ongantíð betri), bara tað er ein góð/skørp andlitsmynd. Tað er tað heila. Tað snýr seg ikki um, hvat felag persónurin umboðar, men bara um persónin sjálvan.
Eru føroyingar veruliga so smædnir – ella lesa teir bara ikki FaroeSoccer?!? :-) Komið nú og takið tykkum saman og sendið okkum nakrar myndir til gleði fyri øll. Tað er jú so ótrúliga lætt at taka myndir í dag, nú hvør hanus og janus eigur eitt gott digitalapparat. Er ivamál um, hvussu takast skal, so er bara at spyrja okkum.
Send okkum bara (helst) myndirnar óviðgjørdar, tvs. ikki skera ella minka tær, lat okkum gera tað. Vit vilja fegin vita, nær myndin er tikin um møguligt (ca. árstal).
Til seinast sjálvsagt ein tøkk til tykkum røsku, sum hava hjálpt okkum higartil – tit vita, hvørji tit eru. Vónandi leggjast fleiri afturat skjótt.