TB og KÍ beina kós

12. umfar
HB - KÍ  0-5
AB - 07 Vestur  3-2
EB/Streymur - TB  1-2
FC Hoyvík - Víkingur  0-2
NSÍ - B68  1-0

Trýst her fyri at síggja fleiri hagtøl frá dystunum, yvirlit yvir støðuna, málskjúttar og kort. 

Formsterkastu liðini í 1. deild eru tey bæði oddaliðini, TB og KÍ. Tá tvørámenn fimm minuttir fyri leiklok skoraðu sigursmálið í Streymnesi móti annars formsterku sundalagsmonnunum, tá var hetta 7. sigurin á rað, og hetta, siga teir har suðuri, hevur ikki hent 1. lið teirra síðani einaferð í 80unum (og skal hetta vera met). Hetta hevur FaroeSoccer tó ikki stundir at kekka nærri í løtuni, men 7 sigrar á rað í 1. deild er ikki tað sama sum 7 á rað í bestu deldini! Men slíkar stimur hava nógv at siga í síðsta enda, tá gerast skal upp, tað er sikkurt. Í løtuni er TB 6 stig (og 7 mál) frammanfyri 07 Vestur á 3. plássi, so tað sær gott út hjá tvørámonnum í løtuni.

So er spurningurin bara, um tað verður sunnudagsfótbóltur hjá TB í Vági komandi ár, og leygardagsfótbóltur hjá FC Suðuroy á sama staði...

Unga KÍ-liðið tykist nú rættuliga t vera komið í gongd, og fimti sigurin á rað var einki minni enn ein avhølving av 2. liði hjá HB í Gundadali. Henda sigursrøðin hevur tikið KÍ upp á eitt gott 2. pláss, bara tvey stig eru upp til TB á oddasessinum. Hendan góða gongdin man uttan iva geva ungu klaksvíkingunum meira mót upp á lívið og trúnna uppá Vodafonefótbólt komandi ár. Men enn er sjálvsagt langt á mál.

Vágamenn, sum annars líktust einum góðum boði upp á uppflyting, er seinastu fýra umførini farnir púra í fisk! Bara tvey stig av 12 møguligum er tað vorðið til, og tað er sjálvsagt alt annað enn nøktandi fyri ambitiøsu vágamenninar. Seinasti ósigurin 3-2 á Argjum móti uppflytaranum og botnkandidatunum var ein stór strikað í rokningini, tí slíkir dystir skulu bara vinnast. 07 Vestur hevur fingið sær nýtt fólk á liðið, á Argjum sóust m.a. gamla verjukempan hjá NSÍ, Óli Hansen, og toppskjúttin hjá 2. liði hjá HB, Johan Ejvind Mouritsen, men líka hjálpti!

Í tyngra endanum gjørdi FC Hoyvík sær lívið í 1. deild enn truplari, tá teir á heimavølli taptu 2-0 fyri 2. liði hjá Víkingum. Tað eru júst sovorðnar dystir FC Hoyvík skal fáa nakað burturúr, um framhaldandi lív skal vera laga teimum í deildini. Hesin ósigurin tók FC Hoyvík niðurum strikuna, og nú er spurningurin kanska, um ikki venjarin, Rúni Nolsøe, hevði gjørt størri mun á 1. deildarliðnum enn í 2. deild! Hvat skal FC Hoyvík í 2. deild brúka teirra oddasess til?

At FC Hoyvík hóast ringu gongdina hevur megnað at halda sær omanfyri strikuna hevur bara verið ússaligu avrikunum hjá B68 og AB fyri at takka. Men nú gekk ikki longur, tá AB púra óvæntað sigraði á vágamonnum og slapp sær upp um strikuna. At so NSÍ eisini vann móti einum annars vælmannaðum B68-liði gjørdi ikki støðuna betri hjá FC Hoyvík.