Vodafonebiðlarnir skinklaðu

1. deild menn

22. umfar
HB-TB  2-1 (fluttur frá 15. september)
16. umfar
HB - NSÍ  3-3
AB - FC Hoyvík  0-3
EB/Streymur - 07 Vestur  3-3
TB - B68  1-0
KÍ - Víkingur  2-4

Trýst her fyri at síggja fleiri hagtøl frá dystunum, yvirlit yvir støðuna, málskjúttar og kort.  

At TB og KÍ skuldu tapa móti móti teimum næstbestu hjá HB og Víkingi – hóast eitt vet styrkt – og at teir næstbestu hjá EB/Streymi mundu knúlva 07 Vestur kom eitt sindur óvart á, men mest av øllum er hetta nokk eitt sindur sigandi fyri dygdina ella støðið í 1. deild sum heild.

Útisetarnir, sum dusa sær í á vøllunum kring landið í hesum døgum, munnu nokk teir flestu hvørva skjótt aftur, og so verður tað sum vanligt, tey liðini, sum liggja fremst og hava støðugastu manningarnar, sum vinna.

Síðani hesar nevndu dystirnar hevur TB so við bit og slit fingið trý stig til hølvdar á heimavølli móti teimum næstbestu hjá B68 og lagt seg á odda í 1. deild, tó við einum dysti fleiri enn hini liðini, tí teir hava spælt ein framskundaðan dyst frá 22. umfari móti HB.

Í botninum eru hoyvíkingar við at fáa samband uppeftir aftur eftir góða 3-0 sigurin á Argjum, har gamli málrevurin, Jørgin Meitilberg, var upp á spæl. FC Hoyvík hevur nú vunnið tveir teir seinastu dystirnar, og halda teir fast í góðu gongdini, so er skjótt, at serliga AB og NSÍ kunnu koma í vandasjógv.

NSÍ vann sær eitt kærkomið stig í Gundadali móti HB sunnudagin. HB vann sær annars eina trygga leiðslu upp á 3-0, men megnaði síðani at tveita gylta møguleikan at nærkast oddaliðunum burtur. Ungu runavíkingarnir góvu ongantíð skarvin yvir og stríddist fyri sakini, tað gjørdu teir ógvuliga væl og fingu uppiborið løn fyri stríðið.

FaroeSoccer fekk annars tikið vangamyndir av 1. deildarliðunum hjá FC Hoyvík, NSÍ og AB í vikuskiftinum, og hesar myndirnar eru nú lagdar út. Frammanundan hava vit vangamyndir av 1. deild hjá  HB, EB/Streymi, B68 og TB. Nú kundu vit gott hugsa okkum myndir av KÍ, 07 Vestur og Víkingi (lósu tit hetta í Klaksvík, Sørvági og Gøtu/Leirvík?).


AB hevði klókliga roynt at styrkt seg eitt sindur til 6-stigsdystin móti FC Hoyvík á nýggja undirlagnum á Argjum - m.a. var Allan Mørkøre við hendan dagin - men tað vísti seg ikki at verða nokk allíkavæl í síðsta enda. Mynd: FaroeSoccer.