Espa�ol English F�royskt

A-landsdystirnir dagførdir

sunnudagur 19. januar 2020
Í sambandi við at onkur ivamál í longri tíð hava verið um nakrar ávísar landsdystir, um hvørt teir vóru at rokna sum almennir ella ikki, hevur FSF nú avgjørt at broyta status fyri tveir av dystunum, men samlaða dystartalið er enn sum áður 198.

Tað er bara FaroeSoccer, sum kann vísa fullfíggjað yvirlit yvir allar føroyskar A-landsdystir og U-landsdystir hjá bæði monnum og kvinnum. Hetta er og verður gjørt í tøttum samstarvi við FSF.

Tá Føroyar gjørdust partur av altjóða fótbóltsfamiljuni í 1988 (UEFA) og 1990 (FIFA), so byrjaði ein onnur tíðarrokning fyri føroyskan landsliðsfótbólt. FSF roknar – við heilt fáum undantøkum – landsdystir frá 1988 sum almennar og allar aðrar undan hesum fyri óalmennar. Hetta er ein avgerð, sum FSF hevur tikið, og soleiðis hevur FaroeSoccer eisini skrásett hesar dystir.

Hóast hetta hava onkur ivamál stungið seg upp, og FaroeSoccer valdi tí  at binda um heilan fingur og at spyrja seg fyri hjá FSF um serstakliga tríggjar dystir hjá monnunum, so eingin feilur ella misskiljing skal koma fyri, tá hagtølini t.d. verða brúkt til at hátíðarhalda dystarjubileum hjá leikarum og at halda skil á metum av ymsum slagi. Vísandi til skrásetingarnar hjá FIFA og UEFA (sum FaroeSoccer hevur avrit av) er niðurstøðan hjá FSF hendan:

1) Dysturin móti Thailandi í 2013 skal vera óalmennur (hann var almennur á FaroeSoccer)
2) Dysturin móti Gibraltar í 2014 skal vera almennur (hann var óalmennur á FaroeSoccer)
3) Dysturin móti Luksemburg í 2004 skal enn sum áður vera óalmennur

Viðmerkingar:
1) Avtalað var, at hetta skuldi vera ein almennur A-landsdystur, men tá avtornaði, møtti Thailand ikki við sínum besta liði. Les annars viðmerkingar á dómaraseðlinum.
2) Dysturin var frá byrjan roknaður sum óalmennur, allarhelst tí Gibraltar ikki var limur í FIFA tá (bara UEFA), men seinni er so avgjørt, at dysturin skal telja við sum almennur.
3) Avtalað var, at hetta skuldi vera ein almennur dystur, men onkursvegna hevur UEFA ikki fingið nóg greið boð um hetta, og eftir dystin vildi Luksemburg ikki, at dysturin skuldi vera almennur.

Sostatt eru øll hagtølini hjá A-landsliðnum hjá monnum nú dagførd á FaroeSoccer og skuldu verið tey almennu hjá FSF til eina og hvørja tíð.

A-landsdystirnir hjá kvinnunum samsvara við yvirlitini hjá UEFA og FIFA.

comments powered by Disqus
Kunning um dagføring av dystum á FaroeSoccer
Til allar brúkarar okkara

Allir dómaraseðlar á FaroeSoccer frá heimligu kappingunum verða vístir við loyvi frá FSF. Síðani 2017 eru allir dómaraseðlar skrásettir elektroniskt í Comet-skipanini hjá FSF, sum FaroeSoccer hevur atgongd til.

Hetta merkir, at tað ber illa til hjá FaroeSoccer at leggja øll fakta frá einum dysti út, áðrenn dómarin er liðugur at skráseta dystin í Comet, og tað hendir tíverri verri enn so altíð beint eftir leiklok. 

Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.


Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í Comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2019