Español English Føroyskt

EBS/Skála fríggjar til næstu greipuna

mánadagur 17. september 2018
SAMANUM EFTIR 16 UMFØR: Verandi meistarar hava kent sína vitjunartíð síðani Evropa Cup-luttøkuna í summar, meðan hinir báðir FM-biðlarnir, KÍ og HB, stríðast við at hanga í. FM-dreymurin hjá HB er tó kámaður nakað.

Upp á 11 teir seinastu dagarnar í august misti HB at kalla alt kappingarárið á gólvið, tá tær í trimum dystum taptu tveir lykladystir í landskappingini og steypafinaluna. Allarmest eiga tær at iðra seg um, at tær ikki vunnu steypafinaluna, tí tær vassaðu í kjansum móti EBS/Skála, sum stóran part av dystinum leikti við bert 10 leikarum, men EBS/Skála vístu aftur, at tær eru ikki oddalið og greipuvinnarar av ongum.

Sum mangan fyrr nevnt, eru tað innahýsisdystirnir millum tey trý ovastu liðini, sum fara at avgera FM, tí allir hinir dystirnir verða vunnir meira og minni lættliga. Í løtuni liggur FM til høgrabeinið hjá verandi meistarunum. Við bert fýra umførum eftir er EBS/Skála á odda, tvey stig frammanfyri KÍ og 3 stig frammanfyri HB og hevur eisini ein væl betri málmun enn KÍ og HB – nakað sum KANN vísa seg at fáa avgerandi týdning í síðsta enda!

Hóast kappingin koyrir púra í tveimum pørtum, so er hóast alt hugaligari, at tað nú eru trý feløg, sum kappast um FM og ikki bara eitt ella tvey sum nógvu seinastu árini.

Dystirnir, sum uttan iva fara at avgera FM í ár eru hesir:

18. umfar 26. september HB - EBS/Skála
19. umfar 11. oktober EBS/Skála - KÍ
20. umfar 26. oktober KÍ - HB

Sum støðan er í løtuni, má EBS/Skála metast at hava bestu kortini á hondini, og alt kann sjálvsagt longu vera avgjørt áðrenn 20. og seinasta umfar 26. oktober, men vónandi heldur spenningurin sær til tað síðsta eins og í fjør, tá EBS/Skála og KÍ spældu eina rimmar ”finalu” á Eiði á seinasta leikdegi.

Meistararnir vóru annars við at snáva í Klaksvík sunnudagin, tá tær ikki fingu tað eina týdningarmikla stigið innanborða fyrr enn í seinastu løtu. Tað tykist, sum EBS/Skála hevur yvirtikið X-faktorin hjá KÍ, hetta at duga at fáa nakað burturúr lykladystunum, eisini tá tað sær svart út.

Í niðara triðinginum í Betri Deildini vann B36 sín fyrsta dyst í ár, tá tær loksins knógvaðu hinum botnliðnum, B68, 3-1 á Toftum.

17. umfar í Betri Deildini verður spælt 23. september:
ÍF/Víkingur - EBS/Skála
B68 - KÍ
B36 - HB

Úrslit og støða og onnur hagtøl í Betri Deildini síggjast annars HER.

Eingin automatisk upp- og niðurflyting er millum Betri Deildina og 2. deild, men vónandi fara nýkosnu vinnararnir av 2. deild, 07 Vestur, at bjóða av í bestu deildini komandi ár. 07 Vestur hevur havt tvey lið við í 2. deild í ár, so leikaragrundarlagið sær út til at vera í lagi.

FaroeSoccer ynskir EBS/Skála eitt seinkað til lukku við steypasigrinum og 07 Vestur til lukku við gullinum í 2. deild.

comments powered by Disqus
Kunning um dagføring av dystum á FaroeSoccer
Til allar brúkarar okkara

Við tað, at FSF nú hevur sína egnu elektronisku skrásetingarskipan, eru eingir fysiskir dómaraseðlar longur til kappingarnar, sum FaroeSoccer skrásetur:

FaroeSoccer kann tí ikki leggja fakta frá dystunum út, áðrenn feløgini og dómararnir hava skrásett hesi í skipanina hjá FSF. Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.

Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2018