Español English Føroyskt

HB heldur summarfrí á fyrsta plássi

mánadagur 2. juli 2018
SAMANUM EFTIR 12 UMFØR: Gongdin í bestu kvinnudeildini er hin sama, og sera tætt er millum tey trý toppliðini. Nú er støðgur í kappingini, men meðan fimm av liðunum fara í summarfrí, eru meistararnir úr EBS/Skála í holt við at fyrireika seg til fyrstu Evropa-luttøkuna í Litava tíðliga í august.

12 av teimum 20 umførunum eru nú leikt í Betri Deildini, og nógv hevur gingið sum væntað. Undan kappingini høvdu nógv – serliga mótstøðuliðini – hug at gera HB til FM-favorittar, og sigast má, at HB hevur livað upp til hesar spádómar, tí higartil hevur gingist serstakliga væl, og eitt tepurt fyrstapláss man vera so ruddiliga góðkent í norðara enda av Gundadali, nú leikararnir eru farnir í summarfrí. Tað er tó sera javnt í toppinum millum HB, EBS/Skála og KÍ í nevndu raðfylgju.

Niðara hálvan er mannað av ÍF/Víkingi, B36 og B68, og tað var eisini væntandi. ÍF/Víkingur vinnur sínar dystir móti hinum báðum, men klárar ikki at bíta ordiliga frá sær móti topp 3-liðunum. B36 og B68 hava tað strævið og hava framvegis ikki vunnið nakran dyst.

Síðani vit skrivaðu um kvinnurnar seinast (eftir 9. umfar), hevur HB fingið ein góðan 1-1 javnleik í Klaksvík og vunnið trygt tvær ferðir: 9-1 á Toftum og 6-0 móti grannunum í Gundadali. Sterkasta vápnið hjá HB er avgjørt álopið við Milju og Heidi, sum hava skorað 30 av teimum 48 málunum hjá HB higartil.

EBS/Skála hevur vunnið allar sínar seinastu tríggjar dystir trygt: 8-2 á Toftum, 3-0 í Gundadali móti B36 og 6-0 heima móti ÍF/Víkingi. Tær leika væl og tykjast í góðum formi nú stóra Evropa Cup-avbjóðingin stendur fyri framman.

KÍ spældi sum nevnt javnt 1-1 móti HB, og hevur síðani vunnið 5-1 í Gøtu móti ÍF/Víkingi og so seinast sera tepurt 2-1 móti B68 í Klaksvík. Her var um reppið, at KÍ tveitti FM-møguleikan fyri borð, tá B68 javnaði til 1-1 í 88. minutti, men megnaðu so allíkavæl at vinna dystin í yvirtíðini. Til hendan dystin manglaði KÍ tríggjar lyklaleikarar: Malenu (skadd), Rannvá (leikbann) og Eyðvør (uttanlands), og tað mundi kosta móti botnliðnum.

Innanhýsisdystirnir millum topp 3-liðini fara uttan nakran iva at avgera FM, og í so máta stendur ein sera týdningarmikil dystur fyri framman, tá kappingini verður tikin uppaftur 19. august, tí tá taka meistararnir EBS/Skála ímóti oddaliðnum HB á Skála. Verður ein vinnari í hesum dystinum, vinnur hetta liðið sær ein greiðan fyrimun í FM-stríðnum. Ein javnleikur kann hinvegin rættuliga loyva KÍ inn í FM-hitan aftur.

13. umfar í Betri Deildini verður spælt 19. august:
EBS/Skála - HB
B36 - KÍ
ÍF/Víkingur - B68

Úrslit og støða og onnur hagtøl í Betri Deildini síggjast annars HER.

Steypakappingin

Síðani seinast eru eisini seinnu hálvfinalurnar í steypakappingini avgreiddar, og heldur ikki her henda nakað ovæntað, hóast KÍ sjálvsagt ongantíð kann avskrivast. HB hevur tó havt gott tak á KÍ í ár, og tær reyð-svørtu vóru eisini sum heild við yvirlutan í Gundadali, har tær vunnu ein tryggan 4-2 sigur og sostatt 9-6 tilsamans. ÍF/Víkingur gjørdi heldur einki við verandi steypavinnararnar í seinnu hálvfinaluni, og EBS/Skála spældi seg í finaluna við einum 2-0 sigri í Gøtu og 4-1 tilsamans.

Steypafinalan millum EBS/Skála og HB verður sostatt ein endurtøka av hendingaríku finaluni frá í fjør, sum EBS/Skála vann 3-2. Finalan verður á Tórsvølli leygardagin 15. september.

Alt um steypakappingina kann síggjast HER.

comments powered by Disqus
Kunning um dagføring av dystum á FaroeSoccer
Til allar brúkarar okkara

Við tað, at FSF nú hevur sína egnu elektronisku skrásetingarskipan, eru eingir fysiskir dómaraseðlar longur til kappingarnar, sum FaroeSoccer skrásetur:

FaroeSoccer kann tí ikki leggja fakta frá dystunum út, áðrenn feløgini og dómararnir hava skrásett hesi í skipanina hjá FSF. Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.

Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2018