Español English Føroyskt

Stroymið kvinnurnar ókeypis, takk

hósdagur 31. mai 2018
FSF hevur í fleiri ár tosað um at raðfesta kvinnufótbóltin hægri. Tað ERU eisini onkur ting hend, men tað er mest, tá tað snýr seg um landsliðini. Tað er heldur ikki nokk, at besta kvinnudeildin fær ein sponsor og skiftir navn. Tað má MEIRA til, og í hesum sambandi er stroyming ein funnin fressur!

Í sambandi við “orrustuna”, sum var herfyri millum KVF og føroysku fótbóltsfeløgini, gjørdu feløgini av at byrja stroyming via FSF-pallin aftur. Fyrsta royndin var seinasta sunnudag, tá 6 dystir í Betri Deildini vórðu vístir, 4 hjá monnunum og 2 hjá kvinnunum. Allir dystirnir kostaðu 39 kr. (um man bara valdi ein dyst).

Tað eru framvegis sera ymsar meiningar millum fólk og í feløgunum um FSF-stroymingina kontra KVF-stroymingina, sum er ókeypis og á hægri støði fyri brúkaran, men sum feløgini ikki halda seg fáa nakað burturúr fíggjarliga. Hinvegin er úrvalið størri via FSF-pallin.

FaroeSoccer hevur ikki nakra avgjørda støðu í hesum málinum, men tá tað kemur til stroyming av kvinnudystunum, so halda vit, at tað átti at verið púra ókeypis at hugt. Feløgini krevja ikki inn, tá kvinnudystir eru, hví skal stroymingin so kosta? Vil man skapa áhuga fyri kvinnufótbóltinum, so er hetta bara steinur omaná byrðu. Sambært FSF vóru bert 11(!) hyggjarar/brúkarar til teir báðar kvinnudystirnar ÍF/Víkingur-HB og EBS/Skála-KÍ (ein toppdystur!), og FaroeSoccer var ein av hesum 11.

Nú var hetta bara fyrsta ferðin, at stroymt varð á hendan hátt í ár, so við meira og betri kunning verða uttan iva fleiri hyggjarar til kvinnudystirnar komandi. Men tað má heilt klárt vera ókeypis!

Tað eru feløgini sjálvi, sum gera av, um stroymingin skal kosta, og FaroeSoccer fer við hesum at heita á feløgini, sum hava kvinnulið í Betri Deildini um at tosa saman, kunna FSF um avgerðina, og vísa kvinnurdystirnar ókeypis í hvussu so er í ár sum eina roynd. Feløgini eiga at síggja fyrimunin av hesum sjálvi, og ein møguligur pengamissur av hesum man vera minimalur. Tað er einki at bíða við.

FaroeSoccer - Vit spæla saman!

comments powered by Disqus
Kunning um dagføring av dystum á FaroeSoccer
Til allar brúkarar okkara

Við tað, at FSF nú hevur sína egnu elektronisku skrásetingarskipan, eru eingir fysiskir dómaraseðlar longur til kappingarnar, sum FaroeSoccer skrásetur:

FaroeSoccer kann tí ikki leggja fakta frá dystunum út, áðrenn feløgini og dómararnir hava skrásett hesi í skipanina hjá FSF. Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.

Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2017