Español English Føroyskt

HB er nýtt oddalið

týsdagur 29. mai 2018
9. UMFAR: KÍ slapp ikki at dusa sær leingi á fyrstaplássinum, tí sunnudagin máttu tær lúta 1-0 í Streymnesi fyri meistarunum. Hendan kjansin lat HB ikki fara framvið borðinum og settu seg einsamallar á ovastu rók eftir tryggan 4-0 sigur á ÍF/Vìkingi í Gøtu.

Tað er spennandi sum ongantíð áður í bestu kvinnudeildini.Tey trý toppliðini skiftast at vinna á hvørjum øðrum, og hesa ferð fløskaðu úrslitini seg best fyri HB. Nú restar bert eitt umfar til kappingin er hálvrunnin, og fyri fyrstu ferð hevur eitt lið lagt seg á odda leyst av kappingarneytunum.

Men tað er tó framvegis so javnt millum liðini, at tá HB hevur verið í Klaksvík næsta umfar, og EBS/Skála hevur verið á Toftum, so kann alt vera púra javnt aftur í toppinum millum teir tríggjar FM-biðlarnar. Fær HB hinvegin stig burturúr dystinum í Klaksvík, so hava tær (kanska) vunnið sær ein lítlan fyrimun í topp 3-kappingini.

KÍ megnaði ikki at halda fast um nývunna fyrstaplássið, tá tær snávaðu í trupla útidystinum móti meistarunum. Dysturin var annars rættuliga javnur fyri tað mesta, men EBS/Skála ognaði sær øll tey trý týdningarmiklu stigini, tá liðskiparin, Ansy Sevdal, bert 18 minuttir fyri tíð var á rætta staðnum og beindi bóltin í netið til tepran 1-0 sigur. Fríðrún var aftur at síggja hjá EBS/Skála, meðan KÍ hinvegin stríðist við nógvar skaðar fyri tíðina, og ikki minst er saknur í roynda veteraninum og liðskiparanum, Malenu Josephsen.

HB hevði tað kanska eitt sindur lættari enn væntað í Gøtu, har heimaliðið spældi væl til tíðir, men alvorliga manglar veruligar áleyparar ella málskjúttar. Hesar hevði HB afturímóti, og ikki minst Milja Simonsen gjørdi eitt gott hál við sínum hatrikki í seinna hálvleiki. Heidi Sevdal skoraði til 1-0 í fyrra hálvleiki, og var hon skarpari hendan dagin, kundi hon saktans havt eitt hattrikk eisini og økt um leiðsluna sum toppskorari í Betri Deildini.

Báðir dystirnir hjá toppliðunum vórðu stroymdir, og tað er at fegnast um. Tað hevði eisini verið stuttligt at frætt, hvussu nógv fólk nýttu hetta góða høvið at síggja føroyskan kvinnufótbólt. Vónandi heldur hendan góða tænastan fram.

Botnliðini bæði, B36 og B68, spældu aftur javnt, hesa ferð 1-1 í Gundadali, tá tað heilt móti dystarenda eydnaðist toftakvinnum at javna leiðslumálið hjá B36 frá fyrra hálvleiki. Sostatt hevur hvørki av liðunum enn vunnið nakran dyst í ár, og tey eru púra jøvn bæði í stigum og málum.

Nú verður ein steðgur í landskappingini til sunnudagin 17. juni, tí HM-landsdystirnir móti Slovenia (6. juni heima) og Kekkia (11. juni úti) standa fyri framman.

10. umfar 17. juni  í Betri Deildini sær soleiðis út:
KÍ - HB
B68 - EBS/Skála
ÍF/Víkingur - B36 

Úrslit og støða og onnur hagtøl í Betri Deildini síggjast annars HER.

Seinni hálvfinalurnar í steypakappingin verða nú leygardagin 2. juni:
HB - KÍ
(HB vann fyrra dystin 5-4)
ÍF/Víkingur - EBS/Skála (EBS/Skála vann fyrra dystin 2-1)

 

comments powered by Disqus
Kunning um dagføring av dystum á FaroeSoccer
Til allar brúkarar okkara

Við tað, at FSF nú hevur sína egnu elektronisku skrásetingarskipan, eru eingir fysiskir dómaraseðlar longur til kappingarnar, sum FaroeSoccer skrásetur:

FaroeSoccer kann tí ikki leggja fakta frá dystunum út, áðrenn feløgini og dómararnir hava skrásett hesi í skipanina hjá FSF. Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.

Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2018