Español English Føroyskt

Skála flutt upp í FM-bólkin

leygardagur 5. mai 2018
U21 MENN SAMANUM: Bólkarnir báðir í undankappingini eru nú liðugt leiktir, og einasti veruligi spenningurin var í grundini, hvør skuldi spæla úrtøkudystir til FM-bólkin. Nú er greitt, at tey bæði liðini verða EB/Streymur og Giza Hoyvík b.

Tað var longu greitt eitt sindur síðani, at EB/Streymur gjørdist nr. 7 og niðast í A-bólkinum og tískil noyddist at leika tveir úrtøkudystir móti nr. 2 í B-bólkinum fyri at tryggja sær eitt av teimum átta plássunum í FM-bólkinum í endaspælinum.

Skála hevur ligið fremst og til uppflyting í B-bólkinum alla tíðina. Men tað hevur drigið út við at finna næstbesta liðið í B-bólkinum, tí so nógvir dystir hava ikki verið avgreiddir til tíðina. Men nú er so brostið fyri nev, tá seinasti útsetti dysturin (frá 2. apríl!) millum TB/FCS/Royn og Giza Hoyvík b, loksins fann ein vinnara. Ella tað vil siga, at FSF gjørdi av, at suðringar skuldu vinna 3-0 uttan dyst, tí hoyvíkingar hava víst lítlan og ongan áhuga at fáa hendan dystin avgreiddan.

Sum skilst eru tey í Giza Hoyvík einki serliga vill við at fáa nakað lið í FM-bólkin, tí tey stúra fyri, at teirra lið ongan kjans hava har. So verður spennandi at síggja um leikararnir á b-liðnum í felagnum eru samdir í hesum, tá teir í tveimum úrtøkudystum skulu leika móti EB/Streymi um rættin til seinasta sessin í FM-bólkinum.

Hetta merkir, at FM-bólkurin verður: NSÍ, AB, B36, HB, 07 Vestur, KÍa, Skála og antin EB/Streymur ella Giza Hoyvík b.

So skjótt sum úrttøkdystirnir eru avgreiddir (8. og 14. mai), fer FSF at leggja nýggju kappingina í FM-bólkinum, og tá hon er klár á comet, so verður hon eisini at síggja her á FaroeSoccer. Vit fara sum sagt bara at skráseta FM-bólkin í FaroeSoccer, tí hini 6 liðini, sum leypa av, spæla ikki um FM longur.

Úrtøkudystir
8. mai á Eiði fyrri dystur: EB/Streymur – Giza Hoyvik b
14. mai í Hoyvík seinni dystur: Giza Hoyvík b – EB/Streymur

Úrslit og støður hjá U21 síggjast HER.

Fyrsta umfar í steypakappingini - kappingin um Thomas Dam Intersport Steypið - hjá U21 fer í gongd nú mánadagin 7. mai við hesum dystum:

NSÍ - 07 Vestur kl. 19:30
AB - ÍF kl. 20:00
KÍ - HB kl. 19:15

Øll U21 steypakappingin sæst HER.

 

comments powered by Disqus
Kunning um dagføring av dystum á FaroeSoccer
Til allar brúkarar okkara

Við tað, at FSF nú hevur sína egnu elektronisku skrásetingarskipan, eru eingir fysiskir dómaraseðlar longur til kappingarnar, sum FaroeSoccer skrásetur:

FaroeSoccer kann tí ikki leggja fakta frá dystunum út, áðrenn feløgini og dómararnir hava skrásett hesi í skipanina hjá FSF. Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.

Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2018