Español English Føroyskt

Undrið stevnur longur upp

sunnudagur 8. apríl 2018
SAMANUM EFTIR TVEY UMFØR: 2. deild hjá monnum hevur nú leikt tvey tey fyrstu umførini av teimum tilsamans 18, og bestu byrjanina hevur uppflytarin; Undrið úr Havn, fingið. Annars er sum vanligt ringt at siga nógv ítøkiligt um hesa (eyka)deildina.

Ársins útgáva av 2. deild bjóðar bara upp á EITT felag, sum hevur sítt besta lið í deildini, og hetta liðið er Undrið. Í fjør var tað B71, sum nú leikar í 1. deild, og í 2016 vóru tað Royn og MB. MB spælir nú í 3. deild, og Royn er partur av samstarvinum TB/FC Suðuroy/Royn.

Meðan bara fá lið í 1. deild hava møguleika at flyta upp, so er kjansurin kanska heldur størri í 2. deild. Minkandi talið av feløgunum ávirkar tó dynamikkin í deildunum, tí tey somu feløgini ganga í nógvum førum aftur í øllum deildum. Nú er tað vorðið vanligt, at størru feløgini hava lið í Betri Deildini, í 1. deild og í 2. deild. Hetta var ikki so vanligt fyri kanska eini fimm árum síðani. Onkutíð sleppa lið heldur ikki upp úr 3. deild, tí tey eru longu umboðað í 2. deild, hetta hendi m.a. í fjør, tá 07 Vestur og KÍ blivu nr. 2 og 3 í FM-endaspælinum.

Í ár hava hesi seks feløgini sítt næstbesta lið í 2. deild: 07 Vestur, AB, B36, B68, EB/Streymur og ÍF. Øll hesi liðini – umframt Undrið – kunnu í teoriini flyta upp í 1. deild, men hjá øllum uttan Undrinum veldst um, hvussu tað gongur liðum teirra í Betri Deildini og í 1. deild. Hini trý liðini, teir triðbestu hjá NSÍ, KÍ og Víkingi, kunnu ikki flyta upp.

2. deild er vorðin ein blanding av hugnafótbólti – serliga hjá triðbestu liðunum (sum valla venja stórvegis) – og so hini, sum fegin vilja hava sítt besta ella næstbesta lið longur upp til seriøsari fótbólt. Tað er sum oftast nokkso stór útskifting á ymsu liðunum frá dysti til dyst, tað veldst onkutíð um hvørjir (U21)leikarar eru tøkir, tí aðrir dystir hava hægri raðfesting, og í nøkrum førum snýr tað seg í veruleikanum ofta bara um at klára at manna liðið – serstakliga til dystir á útivølli. Kanska verður júst hetta frægari í ár, tí eingin dystur er á á Sandi ella í Suðri í ár.

Eftir tvey tey fyrstu umførini, er unga Havnarliðið og suvereni uppflytarin í fjør, Undrið, fremst við fullum stigatalið saman við EB/Streymi. Undrið hevur kanska ikki havt teir truplastu dystirnar á pappírinum móti B68 II og Víkingi III, men teir tykjast at hava styrkt seg enn meira í ár, og tað verður áhugavert at síggja, hvat teir megna í longdini. Annars má man nokk væntað, at serliga teir næstbestu hjá stóru feløgunum B36 og EB/Streymi hava veruligar ambitiónir um at koma upp í 1. deild.

FaroeSoccer fer at fylgja gongdini og taka samanum av og á.

Øll hagtølini um 2. deild finnast her.

comments powered by Disqus
Kunning um dagføring av dystum á FaroeSoccer
Til allar brúkarar okkara

Við tað, at FSF nú hevur sína egnu elektronisku skrásetingarskipan, eru eingir fysiskir dómaraseðlar longur til kappingarnar, sum FaroeSoccer skrásetur:

FaroeSoccer kann tí ikki leggja fakta frá dystunum út, áðrenn feløgini og dómararnir hava skrásett hesi í skipanina hjá FSF. Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.

Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2018