Español English Føroyskt

Meistararnir vóru náðileysar

týsdagur 27. mars 2018
3. UMFAR: Meistararnir úr EBS/Skála fara ikki at lata FM-steypið frá sær aftur við góðum, tað fingu FM-aspirantarnir úr HB veruliga at kenna við Margáir(!). KÍ hongur í nýggja toppliðnum, og ÍF/Víkingur vann síni fyrstu stig.

Stóri dysturin í 3. umfari var toppdysturin millum EBS/Skála og HB. Tað var tó ringt at fáa eyga á meira enn eitt topplið við Margáir.

Alt høgtflúgvandi tos um FM man helst verða tagnað fyribils í norðara enda í Gundadali (og nógva aðrastaðnis fyri tans skuld) eftir hørðu lendingina í Streymnesi sunnudagin. Nú fer eisini at bera illa til hjá EBS/Skála at gera onnur lið til FM-favorittar. Hetta var sjálvandi bara 3. umfar av 20 og fyrsti dystur av fýra móti einum møguligum FM-avbjóðara í Betri Deildini, men sannførandi 6-1 (stór)sigurin sendir eini greið boð út.

HB-venjarin viðgekk blankt stórtapið, men hann var samstundis sera ónøgdur við avrikið hjá sínum liði, sum hann helt slettis ikki møtti upp til dystin. Tað sást, at favorittleikluturin ikki var nakað, sum passaði ungu HBarunum, sum hoknaðu undir trýstinum, og serliga verjuleikurin var veikur og óskipaður. Góða álopið klárar ikki at bera liðið einsamalt, og í Streymnesi formáddu tær sær lítið og einki. Tað verður spennandi, um tær megna at reisa seg aftur, tá ÍF/Víkingur kemur á vitjan í Gundadali komandi umfar.

EBS/Skála vísti stóra styrki og óhugnaligan effektivitet og høvdu at kalla longu vunnið dystin eftir 7. minuttum, tá støðan longu var 2-0. Tær eru kropsliga væl fyri, gjøgnumgangandi skjótar, eru rímliga væl fyri tekniskt, tora at skjóta og eru sum heild væl samanspældar. Hópurin er breiður og ikki so tengdur at, um onkrir ávísir leikarar ikki eru við. Higartil er so einki, sum týðir upp á, at tær ikki kunnu endurvinna greipuna frá í fjør.

KÍ hevur eins og EBS/Skála vunnið allar sínar dystir higartil, hóast tær ikki hava skorað so nógv sum vanligt, og hóast fleiri mál tykjast fara ígjøgnum. 4-2 móti B36 í Gundadali ljóðar eitt sindur tepurt, men veruleikin er, at KÍ átti at vunnið væl meira, men effektiviteturin er ikki tað, hann plagdi. Nýggir ungir leikarar skulu spælast inn, m.a. blaðungu málverjarnir Randi á Bergi (17) og Óluva Joensen (15), harav Óluva byrjaði inni fyrstu ferð sunnudagin. Og altíð vandamikla Maria Thomsen er framvegis saknað í álopinum.

Eitt 4-2 tap fyri KÍ er ikki nøkur katastrofa fyri B36, sum sigur seg hyggja longur fram í tíðina. Hóast góðkenda avrikið móti KÍ mugu tær í B36 allarhelst smyrja seg við, at tær fara liggja í tunga endanum í ár saman við B68. Tær á Toftum hildu, at tær áttu at havt fingið meira burturúr móti ÍF/Víkingi í Gøtu, tær reyðu hildu, at høvuðsmunurin var effektivitetur framanfyri málinum. Men ÍF/Víkingur er nú komið á talvuna, og støðan í Betri Deildini líkist nú sum heild tí, ið væntað varð frammanundan kappingarbyrjan.

Í 3. umfari var tað bert ein leikari, sum royndi seg í bestu deildini á fyrsta sinni.
Óluva Joensen, KÍ

Óluva er fjórði leikarin hjá KÍ, sum fær sínar fyrstu minuttir á besta liðnum, so tað tykist, sum KÍ so smátt er farið í holt við at byggja eitt nýtt lið upp.

Stóri dysturin í 4. umfari í Betri Deildini verður 2. páskadag (mánadagin 2. apríl) í Klaksvík, tá KÍ skal royna at gera nakað við flúgvandi meistararnar. Annars eru dystirnir hesir:

KÍ -EBS/Skála, Dia Lamghauge, kl. 00:00
HB - ÍF/Víkingur, Dánjal Eli West, kl. 00:00
B68 – B36, Aron Sofus Vest, kl. 00:00

comments powered by Disqus
Kunning um dagføring av dystum á FaroeSoccer
Til allar brúkarar okkara

Við tað, at FSF nú hevur sína egnu elektronisku skrásetingarskipan, eru eingir fysiskir dómaraseðlar longur til kappingarnar, sum FaroeSoccer skrásetur:

FaroeSoccer kann tí ikki leggja fakta frá dystunum út, áðrenn feløgini og dómararnir hava skrásett hesi í skipanina hjá FSF. Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.

Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2017