Español English Føroyskt

Sindur “knortlut” byrjan hjá U21

hósdagur 29. mars 2018
U21 MENN – Nýggja kappingin U21, sum avloysir U18-kappingina, hevur nú lagt tey fyrstu trý umførini afturum av teimum tilsamans sjey í innleiðandi bólkaspælinum. Júst sum væntað, hevur alt ikki gingið, sum prestur prædikar.

Ein av høvuðsorsøkunum at broyta U18-kappingina til U21 var at lofta ungum leikarum, sum ofta komu í “ongamannaland” og hvurvu eftir, at teir ikki høvdu aldur til ungdómsfótbólt longur, men hinvegin heldur ikki ordiliga vóru klárir ella nóg sterkir og/ella nóg góðir til vaksnamannfótbólt . Vónin var nokk eisini, at fleiri lið fóru at luttaka í U21 enn í U18 av hesum sama.

Hetta var kanska eitt gott hugskot, men í summum førum kanska meira á pappírinum enn í praksis. Tí fleri lið er tað ikki vorðið til, og tað er (higartil) striltið at fáa avgreitt dystirnar. Dystirnir verða nú ikki avgreiddir mánakvøld, sum var vanligt í U18, men mestsum bara tá tað passar – og ofta passar tað ikki! So longu nú hava fleiri avlýsingar verið, dystir eru útsettir og framskundaðir, ofta í seinastu løtu, so ringt er at fylgja við!

Onkur umboð fyri feløgini, sum FaroeSoccer hevur havt samband við, duga ikki at síggja tann stóra munin á U18 og U21 og halda, at feløgini framvegis  (mis)brúka teir somu ungu leikararnar í ov nógvum kappingum. Eitt stórt felag sum Víkingur hevur einki U21-lið av hesum sama, og HB og 07 Vestur, sum ikki hava funnið ein venjara fyrrenn seinastu dagarnar(!), hava havt trupult við at manna lið higartil. Meiningin við U21 var væl ikki, at feløgini mugu brúka eina rúgvu av U17-leikarum fyri at manna lið? Hinvegin hevur Hoyvíksfelagið Giza Hoyvík (saman við KÍ og NSÍ) heili tvey U21-lið. Gleðiigt er eisini at síggja, at Suðringar hava teknað lið til.

Tað eru tveir bólkar í U21 við 7 liðum hvør. Í innleiðandi bólkaspælinum er bara ein dystur móti hvør øðrum, tvs. 6 dystir. Síðani fara tey 6 fremstu í A-bólkinum víðari í ein FM-bólk. Niðasta liðið (nr. 7) í A-bólkinum skal spæla móti nr. 2 í B-bólkinum um eitt pláss í FM-bólkinum, meðan nr. 1 í B-bólkinum flytur upp í FM-bólkin. Hetta merkir, at 8 lið verða í FM-bólkinum, og 6 lið í hinum bólkinum, báðir bólkarnir spæla vanliga dupultkapping í endaspælinum.

Sum nakað nýtt (og heldur løgið) í ár, spæla liðini ikki ein dyst pr. umfar sum vanligt hevur verið. Tað er rættuliga hips um haps hvørji lið spæla í hvørjum umfari, og stundum spælir sama lið tveir(!) dystir í sama umfari, hóast ikki sama dag. Hetta er gjørt fyri at fáa truplu kabalina at ganga upp, og hetta ber bara til, tí liðini ikki spæla dupultkapping í innleiðandi bólkaspælinum.

Tað er ringt at siga nakað serligt um gongdina í U21-kappingini higartil, men tað kundi verið líkt til, at onkur av teimum “betru” feløgunum fer at fáa tað tungt í A-bólkinum, meðan Skála og Suðringar í B-bólkinum eru góð boð upp á biðlar til eitt pláss í FM-bólkinum.

FaroeSoccer fylgir gongdini, og úrslit og støður síggjast her.

comments powered by Disqus
Kunning um dagføring av dystum á FaroeSoccer
Til allar brúkarar okkara

Við tað, at FSF nú hevur sína egnu elektronisku skrásetingarskipan, eru eingir fysiskir dómaraseðlar longur til kappingarnar, sum FaroeSoccer skrásetur:

FaroeSoccer kann tí ikki leggja fakta frá dystunum út, áðrenn feløgini og dómararnir hava skrásett hesi í skipanina hjá FSF. Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.

Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2017