Español English Føroyskt

Størri spenningur í ár?

fríggjadagur 9. mars 2018
BETRI DEILDIN KVINNUR – Í fjør endaði einaræðið hjá KÍ – eftir 17 FM á rað(!) – tá EBS/Skála loksins koppaði klaksvíkingum. Síðani er besti leikarin í Føroyum aftur farin í HB, og summi hava nú hug at tosa tær reyð-svørtu upp í absolutta toppin.

Tað er ein sannroynd, at seinastu árini eru tað bara KÍ og EBS/Skála, sum hava spælt um FM hjá kvinnunum, meðan HB og partvíst B36 hava verið “best of the rest”. Hetta kann saktans gerast veruleikin aftur í ár, men okkurt kundi tó týtt upp á, at kappingin í oddinum (vónandi) verður eitt sindur harðari og breiðari í ár.

Besta kvinnudeildin er aftur í ár 6 lið – júst tey somu sum undanfarnu tvey árini. Tað kann tulkast bæði positivt og negativt. Tað positiva er væl, at tað ERU 6 lið, tí tað sær ikki út til, at fleiri kvinnur eru farnar at spæla fótbólt seinastu árini, kanska heldur hinvegin, og hetta hóast FSF sigur seg hava raðfest kvinnurnar hægri. Tað negativa er júst tað, at fleiri kvinnur ikki fáast at spæla, so okkurt var at spæla um í botninum eisini. Men so leingi sum næstbesta kvinnudeildin ikki verður spæld á heilum vølli, so er neyvan væntandi, at fleiri lið verða at síggja í bestu deildini í nærmastu framtíð. Vónin er, at serliga Vágarnar og Suðuroyggin fara at bjóða av í bestu deildini einaferð aftur. Men samanumtikið eru 6 lið í bestu deildini ikki nakað vánaligt tal, tá hugsað verður um avmarkaða leikaratilfeingið í smáu Føroyum, og tá liðini spæla fýra ferðir móti hvørjum øðrum (20 umfør), so eru nøkulunda nokk av dystum.

Besta kvinnudeildin – 1. deild kvinnur – hevur á fyrsta sinni fingið eitt sponsornavn, og vit skulu nú venja okkum við at kalla hana Betri Deildin eins og hjá monnunum, og alt gott um tað. Í FSF verður tosað um, at kvinnurnar – ikki bara landsliðið – skulu hava hægri raðfesting, tað hevur man eisini sagt fyrr, men enn hevur man ikki sæð tað stóra til tað ella frætt um, hvussu man ætlar at gera tað. Kanska stroyma fleiri dystir? Kanska skriva meira um kvinnufótbóltin? Kvinnufótbólturin má undir øllum umstøðum gerast sjónligari, eisini í feløgunum. Men kvinnur sum heild mugu eisini sjálvar(!) berjast meira fyri síni søk og ikki minst vilja ogn tora halda seg meira framat ymsu miðlunum!

Kvinnurnar skifta ikki so lætt og so ofta felag sum menninir, allarhelst tí eingir pengar eru í hesum. Og av hesum sama eru at kalla eingir útlendskir leikarar í føroyskum kvinnufótbólti heldur. Men onkrar flytingar eru altíð, og okkum vitandi eru hetta mest týðandi flytingarnar í ár:
Heidi Sevdal frá EBS/Skála til HB
Sarita Maria Mittfoss frá B36 til HB
Sigrun Kristiansen frá EBS/Skála til B36
Ásla Johannesen frá B36 til (Danmark)
Oddny Jacobsen frá B36 til B68
Ana Stojanovic frá KÍ til (Serbia)

Samlað sæð má hetta sigast at vera ein styrkur fyri HB, sum fær tveir offensivar landsliðsleikarar, meðan meistararnir EBS/Skála missa tveir klassaspælarar, og KÍ missur sterka serbiska málverja sín. B36 missur ikki færri enn tríggjar leikarar í betri endanum, og tað fer helst at merkjast, hóast Sigrun Kristiansen sjálvsagt er eitt pluss. Men summi av liðunum hava fingið aðra tilgongd, so tað er ikki sikkurt, tey eru vorðin stórvegis veikari samanlagt.

Betri Deildin leggur út nú sunnudagin við hesum dystum (um kavin loyvir tí):

B68 - HB 15:00
B36 - EBS/Skála (ovari vøllur) 12:15
ÍF/Víkingur - KÍ (í Gøtu) 17:30

FaroeSoccer fer at royna at fylgja gongdini í ár sum frægast, og vónin er, at tá nýggja heimasíðan (og appin) hjá okkum kemur, so fer hetta at verða ómaksleysari og kvinnufótbólturin sum heild áhugaverdari.

comments powered by Disqus
Kunning um dagføring av dystum á FaroeSoccer
Til allar brúkarar okkara

Við tað, at FSF nú hevur sína egnu elektronisku skrásetingarskipan, eru eingir fysiskir dómaraseðlar longur til kappingarnar, sum FaroeSoccer skrásetur:

FaroeSoccer kann tí ikki leggja fakta frá dystunum út, áðrenn feløgini og dómararnir hava skrásett hesi í skipanina hjá FSF. Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.

Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2017