Español English Føroyskt

Áheitan á feløgini um myndatøku

sunnudagur 4. mars 2018
FaroeSoccer roynir stútt og støðugt at taka og útvega nýggjar sum eldri myndir av ymsu aktørunum: leikarum, venjarum og dómarum. Tað er ikki neyðugt fyri hagtølini, men tað er bara so NÓGV stuttligari at síggja eina mynd saman við.

Nýggir leikarar leggjast afturat FaroeSoccer alla tíðina, bæði føroyingar og útlendingar, og hóast myndir sum heild ikki er hægsta raðfesting á FaroeSoccer, so skerst tað ikki burtur, at tað gevur síðuni og brúkarum okkara nakað eyka at síggja, hvussu tey ymsu síggja út. So hetta ER sjálvsagt ein raðfesting.

FaroeSoccer hevur í løtuni tætt við 2.500(!) andlitsmyndir av leikarum, herav  eru gott 2.000 menn og meir enn 500 kvinnur. Harafturat koma so eini 500 andlitsmyndir av venjarum og dómarum. Hetta man allarhelst vera størsta skipaða leikaramyndasavnið í Føroyum. Í nógvum førum eigur FaroeSoccer eisini FLEIRI myndir av ymsu leikarunum (ymisk ár).

Tá hugsað verður um, at tað eru skrásettir eini 9.000 leikarar í dátugrunninum hjá FaroeSoccer higartil, so er klárt, at enn er langt eftir á mál. Tað eru sjálvsagt mest myndir av eldri, og ofta givnum, leikarum (heilt aftur til 1942!), sum mangla, men hesir hava eisini stóran áhuga, og FaroeSoccer hevur alla tíðina antennurnar úti og roynir at finna slíkar (samtíðar)myndir. Her er øll hjálp kærkomin.

FaroeSoccer roynir altíð at liggja framvið at taka myndir, men tað sigur seg sjálvt, at tað er ómøguligt hjá einum manni at koma runt allastaðni.

FaroeSoccer fer við hesum at heita á feløgini og fólk kring feløgini um at hjálpa til at fáa nýggjar leikarar avmyndaðar skjótast tilber, ikki minst útlendingarnar í Betri-deildini, og lata okkum fáa eitt avrit. Sum útgangspunkt hava ALLIR leikarar (og onnur), sum mangla eina mynd, okkara áhuga. Ofta er ein fartelefonmynd ivaleysa góð, serliga um tikið verður uttanfyri (betri ljós).

FaroeSoccer hevur ikki nakra ambitión um at skifta allar andlitsmyndir út á hvørjum ári í t.d. Betri-deildunum, men annað ella triðjahvørt ár hevði ikki verið so galið klárað.

Takk fyri áhugan og fyri hjálpina.

- Vit spæla saman!

comments powered by Disqus
Kunning um dagføring av dystum á FaroeSoccer
Til allar brúkarar okkara

Við tað, at FSF nú hevur sína egnu elektronisku skrásetingarskipan, eru eingir fysiskir dómaraseðlar longur til kappingarnar, sum FaroeSoccer skrásetur:

FaroeSoccer kann tí ikki leggja fakta frá dystunum út, áðrenn feløgini og dómararnir hava skrásett hesi í skipanina hjá FSF. Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.

Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2018