Español English Føroyskt

Nýggja kappingarárið um hornið

mánadagur 26. februar 2018
Nýggja kappingarárið nærkast við sjeymílaferð, og FaroeSoccer er væl fyrireikað og spælir saman sum vanligt. Allar kappingarnar, sum vanliga verða skrásettar, eru nú tøkar á FaroeSoccer.

Í sambandi við skrásetingina av kappingum á FaroeSoccer er einasta broytingin tann, at U21 menn avloysir U18 menn. FSF setur ikki dómarar til lægri deildir, og tískil er ikki ráðiligt hjá FaroeSoccer at fara í holt við slíkar kappingar. Hetta heldur ikki hóast fleiri av hesum kappingum nú verða skrásettar í Comet-skipanini hjá FSF, tí kvaliteturin av skrásetingini er so skiftandi, og FSF hevur ikki nóg greiðar mannagongdir (ella nóg greið krøv til skrásetingina).

Fyrsti almenni dysturin verður Stórsteypadysturin millum Víking og NSÍ, sum verður nú leygardagin 3. mars. Vikuskiftið eftir byrjar so sjálv landskappingin.

FaroeSoccer gongur nú á áttanda(!) árið á netinum, fleiri føroyskar fótbóltssíður eru komnar og farnar síðani tá, men vit hava hildið tað, sum vit lovaðu frá byrjan: FaroeSoccer er ikki nøkur døgnfluga – vit eru komnir fyri at verða!

Men FaroeSoccer er tó ikki nøkur størri sjálvfylgja enn so, at nógv arbeiði og tíð støðugt skal leggjast í síðuna, og uttan samstarv við nógvar partar og fíggjarligan stuðul – serliga frá FSF – hevði neyvan borið til. 

Í fjør setti FSF nýggju skrásetingarskipan sína, Comet, í verk. Hon hevur riggað rímuliga væl og verður uttan iva betri sum frálíður. Tað er nú skrásetingin á Comet, sum fyri størsta partin er/verður grundarlagið undir hagtølunum á FaroeSoccer. Ætlanin er, at FaroeSoccer og FSF skulu arbeiða tættari saman um dáturnar í Comet til gagns fyri báðar partar og fyri øll við áhuga fyri føroyskum fótbólti, men meira um hetta seinni.

Hóast sín “høga netaldur” er FaroeSoccer tó langt frá komið á mál – um nakað mál kann sigast at vera yvirhøvur. Visjónin um FaroeSoccer er í hvussu so er nógv størri enn tað, sum sæst á netinum. Ætlanin (ella vónin) var, at ein nýggj versjón av FaroeSoccer skuldi vera klár til kappingarbyrjan, men hóast nakað er komið á leið, so er framvegis nakað eftir á mál. So fyribils koyrir FaroeSoccer bara sum vanligt – men tað er nú heldur ikki verri enn ilt.

Vit mugu bara bíða í spenningi eftir nýggja FaroeSoccer – uttan iva vert at bíða eftir!

comments powered by Disqus
Kunning um dagføring av dystum á FaroeSoccer
Til allar brúkarar okkara

Við tað, at FSF nú hevur sína egnu elektronisku skrásetingarskipan, eru eingir fysiskir dómaraseðlar longur til kappingarnar, sum FaroeSoccer skrásetur:

FaroeSoccer kann tí ikki leggja fakta frá dystunum út, áðrenn feløgini og dómararnir hava skrásett hesi í skipanina hjá FSF. Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.

Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2017