Español English Føroyskt

Gott nýggjár – FaroeSoccer anir enn

mánadagur 1. januar 2018
Hóast eingin kapping er her heima hesa myrku tíðina, so merkir tað ikki, at FaroeSoccer er farið púra í vetrardvala, hóast tíðindaparturin kundi týtt upp á tað – okkurt hendir altíð handan leiktjøldini.

Ongin orsøk at stúra fyri tøgnini á FaroeSoccer, vit eru her enn :-)

Í samrøðu við Sosialin í 2007 greiddi Marni Mortensen vegna FaroeSoccer fyrstu ferð alment frá um verkætlanina og endamálið við henni – umframt hvørji tey fyrstu málini vóru, m.a. at innlesa allar dystir í ovastu deildunum aftur til 1992. Í dag má sigast, at fyrsta endamálið er rokkið – og væl tað, tíbetur. Í dag var helst trupult at ímynda sær, at hagtølini á FaroeSoccer ikki vóru tøk á netinum – áðrenn 2010 var at kalla einki at fara eftir nakrastaðni!

Síðani FaroeSoccer kom á netið í 2010 – longu 8 ár síðani(!) – og gjørdist ein partur av gerandisdegnum í føroyska fótbóltsheiminum, billa vit okkum inn, at FaroeSoccer hevur verið ein týdningarmikil viðleikari á fleiri frontum, og tað var sjálvsagt eisini ætlanin frá byrjan – ikki minst sum ein álítandi kelda.

Men hóast FaroeSoccer er komið langt síðani byrjanina – omanfyri 18.000 dystir eru nú í dátugrunninum – so er verri enn so komið á mál, um nakað endaligt mál yvirhøvur kann sigast at vera. Vit hava nógv hugskot, sum kunnu menna FaroeSoccer enn meira upp á fleiri mátar, men tað mesta bíðar vegna tvørrandi tíð og pengar til forriting. Vit HAVA tó ítøkiligar ætlanir um at geva FaroeSoccer eina “yvirháling” til nýggja kappingarárið uttan tó at fara í smálutir við nøkrum. Lukkast hetta, hava brúkarar okkara veruliga nakað at gleða seg til!

FaroeSoccer var ongantíð ætlað sum nøkur tíðindasíða, tað snýr seg fyrst og fremst um skráseting, orkan og tíðin er ikki til stórt meira. Verður møguleiki seinni at menna tíðindapartin onkursvegna, so er tað gleðiligt, men í løtuni er tað ikki nøkur raðfesting.

Veturin hjá FaroeSoccer verður oftast brúktur til at “kobla úr” og samla megi aftur og fyrireika komandi kappingarár, samstundis sum kanningararbeiði viðvíkjandi eldru tíðini alla tíðina er í gongd. Hetta seinasta er eisini tíðarkevjandi og sæst ikki so væl aftur á heimasíðuni – men tað skal gerast, og eingin annar fer at gera tað!

Líka síðani FaroeSoccer var í úmbúna, hevur Fótbóltssambandið verið ein góður og týdningarmikil samstarvsfelagi, og hóast FSF fekk sína egnu skrásetingarskipan (Comet) seinasta kappingarár, so hevur viljin til samstarv og at stuðla framvegis verið til staðar, tí partarnir báðir hava ikki júst somu endamál við skrásetingini. FSF virðismetir serliga eldru hagtølini og hagtølini um øll landslið okkara, alt tilfar, sum er ringt ella ómøguligt at finna aðrastaðni, og enn verri i eini handavend. Sum skilst fer FSF aftur at stuðla FaroeSoccer eitt sindur fíggjarliga í ár, og tað eru vit takksamir fyri, tí verkætlanin er framvegis tíðarkrevjandi og hevur útreiðslur við sær.

Vit gleða okkum sum øll onnur til nýggja kappingarárið – vit spæla saman!

comments powered by Disqus
Kunning um dagføring av dystum á FaroeSoccer
Til allar brúkarar okkara

Við tað, at FSF nú hevur sína egnu elektronisku skrásetingarskipan, eru eingir fysiskir dómaraseðlar longur til kappingarnar, sum FaroeSoccer skrásetur:

FaroeSoccer kann tí ikki leggja fakta frá dystunum út, áðrenn feløgini og dómararnir hava skrásett hesi í skipanina hjá FSF. Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.

Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2018