Español English Føroyskt

B71 nærum aftur í 1. deild

sunnudagur 3. september 2017
2. deild menn: Nú øll liðini hava leikað 14 dystir av teimum 18 tykist greitt, at støðgurin hjá B71 í 2. deild verður stuttur. Størri spenningur er um, hvørt Skála ella EB/Streymur flyta upp saman við B71.

Sandoyingar fluttu niður úr 1. deild í fjør, og fyrstu tvey umførini í 2. deild í ár vóru heldur trilvandi við einum javnleiki og einum tapi. Men síðani tá er tað vorðið til 10 sigrar (harav 8 á rað) og tveir javnleikir, og hetta ger, at gull og uppflyting liggur til høgrabeinið á Sandi. Við bert fýra dystum eftir, harav trimum á heimavølli, er B71 á odda við fýra stigum og hevur harafturat ein væl betri málmun enn avbjóðararnir báðir, Skála og EB/Streymur.

Hitt uppflytingarplássið tykist sostatt at vera ein spurningur millum tær næstbestu manningarnar hjá Skála og EB/Streymi. Skála hevur møguliga ein lítlan fyrimun, tí teir í løtuni hava eitt stig og fýra mál meira enn EB/Streymur OG ein heimadyst eftir móti EB/Streymi. Men hinvegin hevur Skála eisini ein dyst eftir móti B71 á Sandi.

Sum gongdin hevur verið higartil í toppinum í 2. deild, skuldi tað ikki undrað, um avgerðin um seinna uppflytingarplássið ikki fellur fyrrenn á seinasta leikdegi  30. september.

Í botninum sær út, sum triðbesta suðuroyarliðið (tað sum var Royn í fjør) er fokið, nú teir einki fingu burtur úr útsetta dystinum móti teimum triðbestu hjá NSÍ í Hvalba leygardagin. Kandidatar at fylgja TB/FCS/Royn niður í 3. deild eru teir næstbestu hjá B68 og AB. Seinastnevndu fluttu niður úr 1. deild í fjør. Av hesum báðum liðunum tykist eftirverandi dystarskráin at vera eitt lítið vet til fyrimuns fyri AB.

Annað lið hjá 07 Vestur og triðbesta liðið hjá KÍ KUNNU tó enda sum partur í niðurflytingarstríðnum, um nokkso illa vil til. Møguliga verður heldur eingin avgerð um niðurflytingina greið fyrrenn á seinasta leikdegi.

Tað er ikki bara hjá sjálvum liðnum, B71, at tað gongur væl, tí leikandi venjarin hjá sandoyingum, áleyparin Símin Hansen, er eisini rættuliga suverenur toppskorari í 2. deild við sínum 17 málum higartil.

Í 3. deild sær út, sum lítla Havnarfelagið, Undrið, er eitt gott boð upp á 2. deildarfótbólt komandi ár, men har er sum skilst einki ordiliga avgjørt enn.

comments powered by Disqus
Kunning um dagføring av dystum á FaroeSoccer
Til allar brúkarar okkara

Við tað, at FSF nú hevur sína egnu elektronisku skrásetingarskipan, eru eingir fysiskir dómaraseðlar longur til kappingarnar, sum FaroeSoccer skrásetur:

FaroeSoccer kann tí ikki leggja fakta frá dystunum út, áðrenn feløgini og dómararnir hava skrásett hesi í skipanina hjá FSF. Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.

Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2017