Español English Føroyskt

Liðugt at skráseta kvinnurnar

hósdagur 17. august 2017
FaroeSoccer er nú loksins komið á mál við at skráseta 1. deild kvinnur aftur til byrjanina í 1985. Hetta merkir at, nú eru øll úrslit, allar endaligar støður og fakta annars um dystirnar tøkt í tann mun, dómaraseðlarnir eru til.

Tað tók sína tíð, men loksins bar á mál við skrásetingini av bestu kvinnudeildini, sum alment byrjaði í 1985 undir heitinum “Gentur 17 ár og eldri”. Kvinnurnar spældu tó eisini í 1984, men hetta verður bara roknað sum eitt royndarár av FSF. B36 vann royndarkappingina í 1984 í tveimum finaludystum móti KÍ.

Í 1984 og 1985 spældu kvinnurnar í tveimum bólkum og so eina finalu. Í 1986 fer man frá bólkaspælinum, og 1. deild kvinnur verður stovnsett við 8 liðum, sum spæla um FM og niðurflyting.

Men skrásetingin er tó ikki meira “liðug” enn so, at kanningararbeiði framvegis verður gjørt, so ymsir smálutir, ið mangla, kunnu fáast upp á pláss sum frægast, eitt nú manglandi føðingardagar, pláss á vøllinum, hvør var venjari ymsu árini, andlitsmyndir (og møguligar liðmyndir) frá aktivu tíðini o.a.

Fyrstu árini fær kvinnufótbólturin millum lítla og onga rúmd í fjølmiðlunum, og tískil er t.d. sera lítið at finna um málskjúttar árini 1985-1988. Ein annar trupulleiki eru teir gomlu dómaraseðlarnir, sum vórðu brúktir tíðarskeiðið 1973-1991, sum eitt nú ikki upplýsa málskjúttar og skiftingar, tvs. tað aloftast ikki ber til at siga, hvør byrjaði inni, og hvør var eykaleikari, og hvørjir málskjúttarnir vóru.

Teir eldru upprunaligu dómaraseðlarnir, sum eru til, eru knýttir til elektronisku seðlarnar á FaroeSoccer sum eyka kunning (sum PDF-fílur). Hetta kann møguliga fáa onkran at minnast betri, og kanska onkur óskrásettur dómari kennir sína krutliundirskrift aftur(!).

Í nøkrum førum (áðrenn 1992) eru leinkjur gjørdar gjørt í elektroniska dómaraseðlinum til dystarfrágreiðingar í bløðunum via tidarrit.fo sum eyka kunning. Hesar leinkjur finnast undir “Viðmerkingar” til dystirnar.

Komandi tíðina fer FaroeSoccer allarhelst at seta seg í samband við fyrrverandi kvinnuleikarar kring landið sum partur av støðuga kanningararbeiðinum at betra um fakta á FaroeSoccer.

FaroeSoccer vónar, at onkrar av eldru leikarunum tíma at seta seg við sínum hagtølum eina løtu og kanska gera viðmerkingar. ALT hevur áhuga fyri FaroeSoccer – hetta er partur av søguni hjá øllum feløgunum, og hetta fer neyvan at verða gjørt av nøkrum øðrum enn FaroeSoccer - nakrantíð!

comments powered by Disqus
Kunning um dagføring av dystum á FaroeSoccer
Til allar brúkarar okkara

Við tað, at FSF nú hevur sína egnu elektronisku skrásetingarskipan, eru eingir fysiskir dómaraseðlar longur til kappingarnar, sum FaroeSoccer skrásetur:

FaroeSoccer kann tí ikki leggja fakta frá dystunum út, áðrenn feløgini og dómararnir hava skrásett hesi í skipanina hjá FSF. Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.

Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2017