Español English Føroyskt

FS ikki partur av kleyvarskapi hjá ÍF

sunnudagur 13. august 2017
Í Kringvarpinum í kvøld rói formaðurin í ÍF undir, at FareSoccer átti sín lut í, at ÍF ikki kláraði at manna liðið fult móti B36 í 1. deild í Havn í dag, og tískil fekk ein søguligan avsmurning. Hesum vísir FaroeSoccer avgjørt aftur.

Tað er klárt, at tað kennist hugtungt og eyðmýkjandi at tapa ein dyst heili 32-0, og tað ikki minni í 1. deild – størsta tapið nakrantíð í næstbestu deildini, og tað er væl skiljandi, at leiðslan í ÍF roynir at finna brúkbarar umberingar. Men FaroeSoccer vil ikki brúkast sum partvísur syndabukkur.

Almennu klokkutíðirnar til ALLAR fótbóltsdystir í Føroyum eru á comet-skipanini hjá FSF. Her fara umboð ella aloftast ein samskipari hjá felagnum inn at skráseta allar dystartíðir á heimavølli hjá felag sínum. FSF skrásetur sjálvt mongu dystartíðirnar í Gundadali eftir einum yvirliti hjá samskiparanum í Gundadali (B36, HB, Undrið). Um 1. deild hjá ÍF hevur tikið feil av klokkutíðunum, er tað 100% teirra egna ábyrgd.

Alt hetta hetta veit formaðurin í ÍF sjálvsagt væl – hann kennir rætta kommandovegin (=comet), men allíkavæl hevur hann hug at draga FaroeSoccer upp í hetta keðiliga málið.

FaroeSoccer hevur frá byrjan av í 2010 av góðum hjarta upplýst dystartíðir í kappingunum, sum vit skráseta. Hetta tí at FSF onga skipan hevði, og tískil var ringt hjá almenninginum at finna tíðirnar samlað á einum staði - skjótt og lætt. Dystartíðirnar fann FaroeSoccer vanliga á heimasíðunum hjá feløgunum og við at “plága” felagsfólk og dómarar, biksut og tíðarkrevjandi.

Nú hevur FSF fingið nýggju skipanina comet at halda stýr á kappingum og dystartíðum, men almenningurin hevur ikki havt atgongd til hana fyrrenn nýliga, nú tað mesta sæst á fsf.fo, og tí vísir FaroeSoccer enn dystartíðirnar. Men nú fáa vit tær beinleiðis frá comet-skipanini (sum FaroeSoccer hevur atgongd til at síggja). Tað kann væl henda, at klokkutíðir verða broyttar á comet, uttan at FaroeSoccer veit nakað um tað, tað verður vanliga gjørt sambært avtalu millum feløgini. Feløgini og einstaklingar eru tó ofta røsk at boða FaroeSoccer frá, tá klokkutíðir broytast, og takk skulu tey hava fyri tað.

Tað hendir eisini av og á, at FaroeSoccer ikki fær boð frá FSF um dystarflytingar, og nú í ringastu feriutíð - eisini í FSF (har tey eru undirmannaði í fyrisitingini umframt) - má FaroeSoccer dagliga vitja comet fyri at finna ófráboðaðar fluttar dystir. 

Dysturin B36-ÍF í dag varð tann 8. august ásettur at vera kl. 18:00 av dystarsamskiparanum í Gundadali, men tann 9. august var hetta broytt til 12:15, men tað hevur FaroeSoccer onkursvegna ikki fingið við. Hetta boðaði B36 so FaroeSoccer frá umleið kl. 16 í gjár, og nakað seinni var tíðin so broytt til 12:15 á FaroeSoccer. Hetta er bara kunning frá okkara síðu, tí vit hava sum sagt ONGA ábyrgd av almennu dystartíðunum, tær eru á comet og feløgini samskifta beinleiðis um hesar.

Tað er sjálvsagt óheppið fyri ÍF, at samskipari teirra, sum allarhelst er tann, ið veit mest um dystartíðirnar hjá felagnum er í feriu, men tað er altso ábyrgdin hjá felagnum sjálvum. Best hevði verið um ÍF tók í egnan barm og viðgekk, at tey eiga hendan brølaran við 1. deild 100% sjálvi.

FaroeSoccer ynskir enn sum áður bara at veita eina góða tænastu, og vit vilja spæla saman við øll feløg sum væl sum tilber - eisini ÍF, men FaroeSoccer er IKKI = FSF og comet.

ES (16. august):
Sum skilst á HB og B36, so var tað bara allarfyrstu tíðina, at FSF inntøppaði dystartíðirnar í comet fyri feløgini, hetta mest vegna vantandi loyvi/atgongd til nýggju skipanina. Nú gera tey tað sjálvi eins og øll onnur feløg, og tað er sjálvsagt tað rætta. Tað er framvegis dystarsamskiparin hjá feløgunum í Gundadali, Rahm í Króki, sum leggur allar dystir í Gundadali, men yvirlitið, hann sendir feløgunum, er fyrst og fremst vegleiðandi. Feløgini gjøgnumganga yvirlitið hvør sær og kunnu gera neyðugar broytingar sjálvi á comet, eitt nú broyta vøll og dystartíðir.

comments powered by Disqus
Kunning um dagføring av dystum á FaroeSoccer
Til allar brúkarar okkara

Við tað, at FSF nú hevur sína egnu elektronisku skrásetingarskipan, eru eingir fysiskir dómaraseðlar longur til kappingarnar, sum FaroeSoccer skrásetur:

FaroeSoccer kann tí ikki leggja fakta frá dystunum út, áðrenn feløgini og dómararnir hava skrásett hesi í skipanina hjá FSF. Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.

Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2017