Kappingin higartil - kvinnur

Tað eru tvey lið, sum hava skarað burturúr í kvinnukappingini seinastu árini, og tað gera tey aftur í ár: KÍ og EB/Streymur/Skála. Hini liðini hava bara ikki tað, sum skal til, fyri at blanda seg í toppin.

Tað ger ongan bilsnan, at EBS/Skála og KÍ eru liðini, sum kappast um FM, tí tað hava tey gjørt tey seinastu 4-5 árini. Størsti spurningurin undan kappingini í ár var, hvussu stóran ávirkan leikaraskiftið hjá stórspælararanum, Heidi Sevdal, frá HB til EBS/Skála, fór at hava í FM-stríðnum. Við sínum higartil 20 málum (av 45), sum gera hana til suverenan toppskorari í 1. deild, hevur Heidi greitt svarað hesum spurninginum. Um KÍ-einaræðið endar í ár, so er Heidi høvuðsorsøkin – uttan annars at taka nakað frá góðu liðfeløgum hennara.

Góða gongdin hjá EBS/Skála speglar seg eisini aftur í, at tað loksins eydnaðist samansetta liðnum at basa KÍ á veg til steypafinaluna. Tær eru nú eru stórfavorittar at vinna steypakappingina á fyrsta sinni – við allari virðing fyri HB annars.

Tá alt hetta er sagt, so er sjálvandi PÚRT EINKI avgjørt í landskappingini enn. KÍ er KÍ, og tær vita, hvat skal til fyri at vinna FM, tað hava vit so ofta sæð fyrr, tá tað hevur staðið á. Tær hava tað við at vaksa við uppgávuni, og harafturat hevur KÍ kanska eisini størri møguleika enn EBS/Skála fyri at styrkja seg til avgerandi dystirnar. Eitt er greitt, og tað er, at hvørki av toppliðunum hevur ráð at tveita stig burtur móti hinum liðunum. Hetta plagar at vera styrkin hjá KÍ, men kanska EBS/Skála hevur lisið betri upp á nú, tað hava tær so víst higartil í ár.

Toppliðini bæði eru púra jøvn á 30 stigum, hava vunnið hvør sín innanhýsisdyst og annars allar hinar dystirnar. Nú 9 umfør eru eftir at leika av teimum 20 eru tað bara 3 mál, sum skilja liðini. Bæði liðini vita, at tey MUGU vinna móti veikaru liðunum – hvørja ferð(!), og helst eisini so nógv sum tilber, tí málúrtøkan kann gerast avgerandi. Tað er tó mest hugsandi, at teir báðir eftirverandi dystirnir millum toppliðini fara at avgera FM í ár. EBS/Skála eigur heimavøll móti KÍ í seinasta umfari 7. oktober.

Hini feløgini í 1. deild hava sum so mangan fyrr ikki teir neyðugu (lykla)leikararnir fyri at gera seg galdandi í FM-stríðnum, og tað vísir seg trupult at halda upp á eina góða stammu. B36 og HB kappast aftur um bronsuna í ár, meðan felagsliðið ÍF/Víkingur og B68 royna at sleppa undan niðasta plássinum, sum tó ikki ber nakra niðurflyting við sær. HB er á bronsuplássinum sum er, og tær hava aftur í ár baksað seg í steypafinaluna, so higartil er teirra kappingarár nokk góðkent.

Okkum vitandi er KÍ einasta liðið í Evropa, ið hevur luttikið í UEFA Women’s Champions League øll árini, síðani kappingin byrjaði í 2001. Í ár lutaka tær sostatt fyri 17. ferð uttan slit, tá leiðin gongur til bólkaspæl í Kroatia 22-28. august. Verður tað 18. ferð næsta ár, ella fáa Føroyar tá eitt nýtt  umboð til hesa kappingina?

Steypafinalan – tann fyrsta uttan KÍ síðani 1998(!), verður sum nevnt millum HB  og EBS/Skála. Dysturin verður leiktur á Tórsvølli 9. september.