Español English Føroyskt

Kappingin higartil - menn

sunnudagur 25. juni 2017
Nú landskappingin er farin í summarfrí, tekur FaroeSoccer eitt sindur samanum ymsu kappingarnar. Sannast má tíbetur enn einaferð, at ikki gongst altíð, sum prestur prædikar.

Effodeildin: Toppurin er sum væntað
FaroeSoccer ger ikki stórvegis burturúr Effodeildini, tí tað gera so nógv onnur. Heilt stutt kann sigast, at toppurin er sum væntað, meðan stóru vónbrotini eru HB og ÍF – í hvussu so er um man spyr viðhaldsfólk teirra! Sólskinssøgan higartil má sigast at vera nýggja samstarvsfelagið hjá suðuroyingum. Árið kann annars blíva søguligt við tað, at tað kann henda, at bara eitt lið flytur niður, tí bert tað eina av teimum trimum liðunum, sum kunnu flyta upp úr 1. deild, er í topp 3 sum er.

Liðskiparin og áleyparin hjá NSÍ, Klæmint Olsen, bumbar við sama lag, hann sær út til at blíva toppskorari aftur í ár, 5. árið á rað(!), og tað er bara ein spurningur um tíð, nær hann er mest skorandi leikarin í bestu deildini yvirhøvur í Føroyum, og væl tað – og tað verður seinur dagur, at hann verður tikin aftur!

1. deild menn:  Soðið tykist tunt
Í ár eru bara trý lið sum kunnu flyta upp: AB, B68 og Giza Hoyvík. Av hesum sær út til, at annar niðurflytarin í fjør, AB, fer at greiða sín setning, meðan B68 enn ikki hevur megnað at bart seg í topp 3, sum krevst fyri at flyta upp. Málið hjá Giza Hoyvík er fyrst og fremst at verða verandi í deildini, so teir ikki skulu spæla 2. deildarfótbólt á nýggja Hoyvíksvølli komandi ár. Teir næstbestu hjá KÍ og NSÍ tykjast góðir í ár, men fær B68 onkran munagóðan styrk í summar (sum man hoyrir slatur um), so er væl hugsandi , at KÍ og NSÍ fara at “krakelera” eitt sindur, tí man veit, at manningarnar á næstbestu liðunum ofta skifta nógv í einum longum kappingarári.

Nýggja samstarvið í suðri hevur ikki hepnast í sama mun fyri teirra næst- og triðbestu, sum fyri Effoliðið, tí hesi bæði liðini (fyrr: FC Suðuroy og Royn) berjast móti niðurflyting. Bæði liðini, sum fluttu upp úr 2. deild í fjør, B36 og ÍF, hava tað tungt í botninum í 1. deild. Hjá fuglfirðingum er heilt galið, og teir kunnu væl metast sum foknir longu (og tað ENN meira, tí Effoliðið eisini liggur til niðurflyting), meðan B36 enn hevur ein rímuligan kjans at bjarga sær.

2. deild menn:  Sandoyingar stevna beint uppaftur
B71 flutti niður í 2. deild í fjør, men tað sær ikki út til, at teir ætla sær at steðga leingi har. Í 2. deild verða bara 18 umfør leikað, og sigast má, at nógv skal ganga galið hjá oddaliðnum úr Sandoy, um teir ikki fáa minst annað uppflytingarplássið. Seks umfør eru eftir, og av hesum hevur B71 fimm(!) heimadystir. Hitt uppflytingarplássið stendur milum tær næstbestu hjá EB/Streymi og Skála.  Í botninum í 2. deild stríðast niðurflytararnir, næstbesta liðið hjá AB ,og teir triðbestu hjá TB/FCS/Royn fyri tilveruni í deildini og eru í verandi løtu “favorittar” at fara í 3. deild.

U18: kappingin stendur millum Havnina og Runavík
Fýra umfør av teimum 12 eru leikað í FM-bólkinum, og ikki óvæntað eru tað HB, B36 og NSÍ, sum togast um oddasessin, og føroyameistarin fer uttan iva at vera eitt av hesum trimum liðunum. KÍ og AB kunnu saktans gera ein vørr, men tey koma neyvan í topp trý.

Steypakappingarnar
Finalan um Løgmanssteypið verður millum B36 og NSÍ í ár. B36 hevur ikki verið í finaluni síðani 2008, og NSÍ var seinast í finaluni í 2015. Bæði liðini taptu tá finaluna, so hetta eru tvey svong lið, ið møtast í finaluni. Harafturat kann ein steypasigur hava týdning fyri serliga B36, tí so er eitt Europa League pláss longu tryggjað til komandi ár.

Finalan í kappingini um Thomas Dam Intersport steypið hjá U18 verður “sum vanligt” millum NSÍ og HB. Hetta er fjórða árið á rað, at liðini møtast í finaluni, HB vann í 2014 og 2015, men í fjør lukkaðist betri hjá NSÍ.

Báðar finalurnar verða á Tórsvølli 26. august.

comments powered by Disqus
Kunning um dagføring av dystum á FaroeSoccer
Til allar brúkarar okkara

Við tað, at FSF nú hevur sína egnu elektronisku skrásetingarskipan, eru eingir fysiskir dómaraseðlar longur til kappingarnar, sum FaroeSoccer skrásetur:

FaroeSoccer kann tí ikki leggja fakta frá dystunum út, áðrenn feløgini og dómararnir hava skrásett hesi í skipanina hjá FSF. Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.

Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2017