Español English Føroyskt

AB/B71 tikið seg úr kappingini

hósdagur 30. mars 2017
1. deild kvinnur, 3. umfar: AB og B71 tóku avleiðingarnar av risastóru ósigrinum í fyrstu umførunum og hava tikið felagsliðið úr kappingini. Hetta merkir allarhelst, at øll kvinnukappingin má leggjast av nýggjum.

KÍ slapp ikki at royna at taka gamla met sítt í 2012, tá tær sigraðu 26-0 móti FC Suðuroy, tí  AB/B71 tók seg – uttan iva skilagott – úr kappingini áðrenn dystin í Klaksvík. Úrmeldingin hjá AB/B71 hevur við sær, at øll stig og mál vunnin ella tapt móti hesum liðnum, fella burtur. Tað kunnu B36 og EBS/Skála og serliga 10-málsskjúttin Heidi Sevdal iðra seg um. Støðan á FaroeSoccer er rættað sambært hesum.

Sum skilst skal AB/B71 nú spæla í 2. deild í staðin sum tað 8. liðið, og tað er nokk eitt gott hugskot, og FaroeSoccer ynskir teimum bestu eydnu í hesi kappingini, sum uttan iva fer at passa teimum betri. Einki verður upplýst úr FSF, um hendan kúvendingin hjá AB/B71 hevur borið nakra revsing við sær fyri feløgini.

Nú bara 6 lið eru eftir í 1. deild, skal FSF allarhelst finna ein nýggjan leist til kappingina (samstundis sum nakrir dystir longu eru leiktir). Sum skilst er ætlanin, at liðini skulu spæla fýra ferðir móti hvørjum øðrum eins og í fjør, tvs. 20 umfør tilsamans. FSF fer at kunna um málið ein av fyrstu døgunum.

Hinir báðir dystirnir í 3. umfari vórðu avgreiddir sum ásett, og ikki óvæntað vann EBS/Skála á heimavølli á Skála móti HB. Men tepri 2-1 sigurin kom ikki lætt í hús, og tey í HB vóru sum skilst sera ónøgd við sigursmálið hjá Heidi Sevdal, sum kom 13 minuttir fyri leiklok. HB helt seg eiga klárt fríspark í støðuni, sum leiddi til málið, men sum heild var sigurin ikki óuppiborin.

Í Gøtu kløkkaðu toftakvinnur uttan iva felagsliðið ÍF/Víking, tá tær skoraðu eitt mál tíðliga í dystinum og síðani hildu fast líka til leiklok. Í fjør skoraði B68 bara 2 mál í 20 dystum og fekk bert eitt stig, so við hesum málinum og teimum trimum stigunum hevur B68 fingið eina fína byrjan í ár. Tær vóru sum kunnugt eisini sera nær við at fáa stig móti KÍ í 2. umfari. ÍF/Víkingur fekk 10 av sínum 16 stigum í fjør móti B68, men soleiðis verður ikki aftur í ár.

Fyri HB fekk Barbara Prior (18) sínar fyrstu minuttir í bestu deildini.

comments powered by Disqus
Kunning um dagføring av dystum á FaroeSoccer
Til allar brúkarar okkara

Við tað, at FSF nú hevur sína egnu elektronisku skrásetingarskipan, eru eingir fysiskir dómaraseðlar longur til hesar kappingar, sum FaroeSoccer skrásetur:

Effodeildin, 1. deild menn, 2. deild menn, U18 dreingir, 1. deild kvinnur og Steypakappingarnar M/K.

FaroeSoccer kann tí ikki leggja fakta frá dystunum út, áðrenn feløgini og dómararnir hava skrásett hesi í skipanina hjá FSF. Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.

Samstarvsfelagar
2010-2017