Español English Føroyskt

Byrjanartrupulleikar við comet

mikudagur 29. mars 2017
Øll byrjan er torfør, og nýggja comet-skrásetingarskipanin hjá FSF er undir ávísum trýsti í hesum døgum, nú flestu kappingar eru farnar í gongd. FaroeSoccer hevur atgongd til skipanina og skrásetur eftir henni.

Comet-skipanin er ein stór KT-skipan eftir føroyskum viðurskiftum. Tað eru kroatar, sum hava ment skipanina, sum eini 20 lond/Fótbóltssambond brúka, tey flestu í Eysturevropa. Skipanin er sjálvsagt í ávísan mun snikkað til føroysk viðurskifti. Høvuðstingini á comet – í hvussu so er fyri FaroeSoccer – er nýggi leikaradátugrunnurin og elektroniski dómaraseðilin.

Tilgongdin hevur verið nokkso long, men átti kanska at verið eitt vet longri, so serliga feløgini og partvíst dómararnir kundu havt meira tíð at fyrireika seg til stóru broytingarnar. Men nú er comet-skipanin so tikin í brúk, og byrjanin hevur verið rímuliga góð, og FSF roynir at takla allar trupulleikar, sum stingast upp, so hvørt og skjótast tilber.

Størsti (fyri)munurin fyri FaroeSoccer í mun til fyrr er, at fysiski dómaraseðilin er avtikin. Nú síggjast allir dómaraseðlar á comet á netinum (um man hevur atgongd). Endaligu manningarnar eru sum útgangspunkt tøkar – og kekkaðar av dómaranum – longu ein tíma áðrenn dystarbyrjan, hetta er ein betring fyri øll, ikki minst fjølmiðlarnar. Beint eftir dystarlok – ella skjótast tilber – skrásetur dómarin so hendingarnar í dystinum og minutttølini.

Tá dómarin hevur skrásett sín part og leysgivið dómaraseðilin í skipanini, so er hann læstur, og dómarin sleppur ikki inn á hann aftur at broyta/rætta nakað. Skal nakað rættast ella skrásetast afturat eftir hetta, so má dómarin ella feløgini boða FSF frá hesum – og gjarna FaroeSoccer samstundis um møguligt. Møguligir feilir ella manglar verða vanliga fyrst funnir á FaroeSoccer, tí FSF hevur ikki nakra heimasíðu, sum vísur dómaraseðlarnar. Comet-skipanin er bara fyri tey, sum FSF gevur atgongd, tað er í løtuni typiskt dómarar og útvald umboð fyri feløgini.

FaroeSoccer fær tó í fyrstu atløgu einki gjørt í málum við skeivleikum (uttan so at vit sjálvir hava skrivað skeivt av frá comet), tí vit hava í prinsippinum ikki loyvi at broyta nakað, sum ein dómari hevur skrásett, ella at leggja nakað afturat, sum (kanska) manglar. Men vit vilja tó SERA fegnir frætta um møguligar skeivleikar ella manglar á FaroeSoccer, tí sjálvsagt skal alt vera so rætt sum tilber. EINKI er ov lítið at gera vart við!

Um úrslit og dómaraseðlar vanta á FaroeSoccer, so er orsøkin allarhelst tann, at dómaraseðilin ikki er tøkur á comet, tvs. at dómarin hevur ikki skrásett hann lidnan av einhvørjari orsøk.

FSF hevur fingið NÓGV at hugsa um og gera, nú comet-skipanin er sett í verk. Man lærir okkurt nýtt hvønn dag. FaroeSoccer dámar sum heild væl nýggju skipanina, og vit royna sum frægast at vera ein viðspælari eins og feløg og dómarar.

comments powered by Disqus
Kunning um dagføring av dystum á FaroeSoccer
Til allar brúkarar okkara

Við tað, at FSF nú hevur sína egnu elektronisku skrásetingarskipan, eru eingir fysiskir dómaraseðlar longur til hesar kappingar, sum FaroeSoccer skrásetur:

Effodeildin, 1. deild menn, 2. deild menn, U18 dreingir, 1. deild kvinnur og Steypakappingarnar M/K.

FaroeSoccer kann tí ikki leggja fakta frá dystunum út, áðrenn feløgini og dómararnir hava skrásett hesi í skipanina hjá FSF. Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.

Samstarvsfelagar
2010-2017