Español English Føroyskt

KÍ slapp við skrekkinum

mikudagur 22. mars 2017
1. deild kvinnur, 2. umfar: Tað var líka við, at KÍ kiksaði á Toftum, men beint fyri leiklok glapp. AB/B71 var aftur fyri avsmurningi, og HB vann heldur óvæntað grannauppgerðina.

EB/Streymur vísti unga og óroynda liðnum AB/B71 onga náði, tá liðini hittust á Sandi sunnudagin. Serliga var Heidi Sevdal í hopla og skoraði heili 10 av teimum 24(!) málunum, men Margun Lindholm gjørdi sanniliga eisini um seg við sínum 7 málum.

Tað er ringt at siga nakað meiningsfult um ein dyst, sum endar 24-0. Hetta er næststørsti ósigur í bestu kvinnudeildini, síðani KÍ vann 26-0 móti FC Suðuroy í Klaksvík 2012 – tá skoraði Ranvá Andreasen 11 mál. FC Suðuroy var seinni koyrt úr kappingini tað árið, tí tær ikki møttu til ein dyst, men spældu dystirnir taldu, tí tær høvdu spælt fleiri enn helvtina av dystunum, áðrenn tær vórðu koyrdar úr.

Nú hevur AB/B71 tapt báðar fyrstu dystirnar 19-0 og 24-0, og næsti dystur er móti KÍ í Klaksvík sunnudagin. Munnu ungu genturnar – tær allarflestu úr Sandoy – ikki longu (væl skillligt) stúra fyri hesum dystinum? Um eitt líknandi úrslit bíðar sum tey bæði fyrstu, er so nøkur verulig meining at vera í bestu deildini? Hevur hetta nakað ítróttarligt virði? Er hetta mennandi fyri nakran?

FaroeSoccer dugur ikki at síggja, hvussu hetta kann menna ungu leikararnar hjá B71 og AB. Áttu feløgini ikki heldur at havt teknað genturnar til 2. deild fyrst, so tær kundu fingið eitt sindur av royndum at leika móti vaksnum og kropsliga sterkari leikarum? Sum skilst fer FSF ikki at blanda seg, so leingi AB/B71 møtir til dystirnar, tað er sostatt púra upp til feløgini bæði sjálvi, um nakað skal henda, ella um nakað skal broytast.

Meðan EBS/Skála streyk til tops við stórsigrinum á Sandi, so hevði KÍ tað óvæntað trupult á Svangaskarði í vindi og kulda móti einum betraðum og uppsettum B68-liði. KÍ hevði tað mesta av spælinum, og serliga í undanvindinum í seinna hálvleiki trýstu tær, men mál kom einki fyrrenn liðskiparin og superveteranurin kom úr verjuni fram at orðna paragraffirnar. Malena Josephsen snittaði eitt innlegg við høvdinum í netið í næstseinasta minutti og bjargaði sostatt teimum trimum “obligatorisku” stigunum. Tað hevur altíð verið vørumerki hjá KÍ-kvinnunum at vinna slíkar dystir sum hesar, og tað er tað, sum hevur gjørt tær so suverenar.

Tepri KÍ-sigurin á Toftum KANN kanska vera eitt tekin um, at broytingartíðir eru á veg, tí EBS/Skála tykist nógv styrkt við tilgongdini av Hedi Sevdal. Hinvegin skal man ikki leggja alt ov nógv í eina heldur laka KÍ-byrjan – sum hóast tað hevur kastað fult stigatal av sær! KÍ hevur ikki spælt við sterkastu manning enn, eitt nú eru Bára Klakstein og Hervør Olsen skjótt væntandi aftur, og Eyðvør Klakstein kemur helst so skjótt, sum kappingin í Spania er liðug tíðliga í mai.


Elin Maria Isaksen, HB
Áleyparin úr Kvívík, Elin Maria Isaksen, er við sínum 22 árum hin næstelsti og ein hin mest royndi leikarin í HB-hópinum við sínum 129 1. deildardystum. Mynd: hb.fo - Rakul Hansen.


B36 hevði gott tak á HB í fjør og endaði eisini væl omanfyri HB í stigatalvuni, og eftir stórsigurin hjá B36 í fyrsta umfarinum, varð ikki roknað við, at unga og nógv broytta HB-liðið fór at gera nakað serligt við grannarnar.  Kanska var dysturin longu vunnin í høvdinum á summum av B36-kvinnunum áðrenn fyrsta bríksl. Á pappírinum ER B36 nokk eisini sterkari liðið, men dystirnir skulu jú sum kunnugt leikast á vøllinum, og her hevði HB-venjarin funnið røttu uppskriftina, og við eini væl upplagdari Rebekku Benbakoura í álopinum fekk HB eina dreymabyrjan uppá nýggja kappingarárið við sínum 3-0 sigri. Ein longri dystarfrásøgn frá dystinum er at lesa her á hb.fo.

HB-liðið er sum nevnt nógv broytt í mun til í fjør. Fleiri royndir leikarar eru farnir, eitt nú landsliðsleikararnir, Milja Simonsen (toppskorari í 1. deild í fjør), Lív Arge, veteranurin og liðskiparin, Liljan Petersen, og Valgerð Andreasen. Men tær ungu í felagnum sleppa nú at royna seg (meira), og tilgongdin av roynda málverjanum, Simonu Heinesen, er ein styrkur. Verjuleikarin, Janita Ole-Jacobsen er eisini komin frá EBS/Skála. At báðar sandskvinnurnar og landsliðsleikararnir, Jónvá Hentze og Ása á Reynatúgvu (nýggjur HB-liðskipari) hava valt at halda fram í HB, er eitt pluss fyri liðið.

Hóast góða sigurin í fyrsta dystinum skal HB neyvan vænta at koppa B36 í longdini í kappingini um bronsuna, tær reyð-svørtu skulu nokk fyrst og fremst royna at halda ÍF/Víking, B68 og AB/B71 aftanfyri seg.

Hetta umfarið fingu tríggir leikarar sín fyrsta dyst í bestu deildini:
Sanna Jacobsen (15) KÍ
Nadja Johannesen (18) HB
Jana Thomsen (20) AB/B71 
Klikka á eitt lið í støðuni, so kemur tú inn a hópin higartil í ár, og leikarar við feitari skrift hava spælt sín fyrsta dyst á besta liðnum í ár.

Øll hagtølini í 1. deild kvinnur eru her. 

comments powered by Disqus
Kunning um dagføring av dystum á FaroeSoccer
Til allar brúkarar okkara

Við tað, at FSF nú hevur sína egnu elektronisku skrásetingarskipan, eru eingir fysiskir dómaraseðlar longur til hesar kappingar, sum FaroeSoccer skrásetur:

Effodeildin, 1. deild menn, 2. deild menn, U18 dreingir, 1. deild kvinnur og Steypakappingarnar M/K.

FaroeSoccer kann tí ikki leggja fakta frá dystunum út, áðrenn feløgini og dómararnir hava skrásett hesi í skipanina hjá FSF. Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.

Samstarvsfelagar
2010-2017