Español English Føroyskt

FaroeSoccer á einum vegamóti

mikudagur 1. mars 2017
Eitt nýtt kappingarár er um hornið, og FaroeSoccer ætlar sær at spæla við sum vanligt. Men við tað at FSF nú fer at koma við síni egnu skrásetingarskipan, er framtíðin hjá FaroeSoccer kanska eitt sindur óviss.

FaroeSoccer kann sigast at vera á einum vegamóti í løtuni. Hetta er fyri ein part tí, at FSF nú fer at koma við síni egnu elektronisku skrásetingarskipan. Í løtuni ógreitt, um nakað formelt samstarv verður millum FaroeSoccer og FSF, sum tað annars hevur verið síðani FaroeSoccer kom á netið fyrstu ferð í 2010.

Sum skilst ætlar FSF nú at sleppa sær av við fysisku dómaraseðlarnar - í fyrstu atløgu í teimum deildunum, sum FSF setur dómarar til, tvs. meira ella minni tær kappingar sum FaroeSoccer skrásetur í løtuni. Spurningurin er so, hvussu FaroeSoccer kann fáa fakta um hesar dystirnar - og ikki minni hvussu skjótt.

Nógvu seinastu árini hevur FSF í ársfrágreiðing síni sagt seg vera sera væl nøgt við samstarvið við FaroeSoccer og avrik okkara. Í seinastu ársfrágreiðingini fyri 2016 standa hesi jaligu orð um FaroeSoccer:

“Heimasíðan FaroeSoccer hevur aftur í 2015 (2016, red.) verið ein týðandi viðleikari í føroyskum fótbólti. Feløg, fjølmiðlar, fjepparar o.o. hava notið stóra gleði av arbeiðinum, sum Marni Mortensen (og Eyðun Lamhauge, red.) vegna FaroeSoccer hevur framt. Seinasta árið hevur FaroeSoccer eisini verið úti í feløgunum og vitjað.

Enn er ikki avgjørt, hvussu framtíðarsamstarvið kemur at síggja út, nú nýggja FMS-skipanin verður tikin í brúk. FMS-skipanin hevur verið leingi ávegis, men nú verður hon royndarkoyrd við Stórsteypadystinum, og síðani verður hon gjøgnumførd í fleiri deildum, har FSF ásetur dómararnar.”


FaroeSoccer hevur sent FSF eitt skriv við uppskoti um samstarv og einum fyrispurningi um fíggjarligan stuðul fyri 2017, men enn hava vit ikki frætt aftur. Uttan stuðul frá FSF (ella onkrum øðrum) gerst raksturin av FaroeSoccer munandi tyngri. Hendan stóra verkætlanin er tíverri ikki er ókeypis at reka, og verður sum kunnugt bert gjørd í ofta avmarkaðu frítíðini. Nýggja skipanin hjá FSF fer ið hvussu so er í fyrstu atløgu bara at vísa hagtøl frá 2017, og tískil má metast, at brúk er fyri FaroeSoccer framvegis.

Hóast ivasomu útlitini beint nú, so hava vit framvegis stórar ætlanir við FaroeSoccer. Ein av hesum er at flyta allar dáturnar til ein nýggjan pall, og síðani forrita alt umaftur til eina spildurnýggja heimasíðu. FaroeSoccer skal vera munandi betri og brúkaravinarligari, ikki minst í sambandi við fartelefonir, har vit tíverri hava verið eftirbátar, her er ein nýggj app uppløgd. Um HEILT væl gongst í hond, so kann nýggja FaroeSoccer verða klárt seinni í ár, men annars (vónandi) til kappingarárið 2018. Inntil tá verður dagført sum vanligt á núverandi FaroeSoccer.

Vit spæla saman! 

comments powered by Disqus
Kunning um dagføring av dystum á FaroeSoccer
Til allar brúkarar okkara

Við tað, at FSF nú hevur sína egnu elektronisku skrásetingarskipan, eru eingir fysiskir dómaraseðlar longur til kappingarnar, sum FaroeSoccer skrásetur:

FaroeSoccer kann tí ikki leggja fakta frá dystunum út, áðrenn feløgini og dómararnir hava skrásett hesi í skipanina hjá FSF. Er nakar trupulleiki ella okkurt at spyrja um, so eru tit vælkomin at ringja á 520515/320515 ella skriva til fotboltshagtol@gmail.com.

Dystartíðir

Gevið gætur at dystartíðirnar fyri komandi dystir á FaroeSoccer eru einans vegleiðandi. Dystartíðirnar í comet-skipanini hjá FSF eru tær galdandi tíðirnar til eina og hvørja tíð.

Samstarvsfelagar
2010-2017