Kærur kunnu avgera 2. deild
mikudagur 1. oktober 2014
2. deild menn: Núverandi støðan í 2. deild áðrenn seinasta umfarið skal takast við ávísum fyrivarni, tí tvær kærur hjá MB og B71 liggja á borðinum hjá Aganevndini og bíða.
Núverandi støðan í 2. deild áðrenn seinasta umfarið skal takast við ávísum fyrivarni, tí tvær kærur hjá MB og B71 liggja á borðinum hjá Aganevndini og bíða. Vinnur B71 sítt kærumál, eru teir longu fluttir upp saman við MB.
Í 16. og triðseinasta umfari í 2. deild gjørdist greitt, at MB varð annað av teimum báðum nýggju liðunum í 1. deild komandi ár, nú var spurningurin bara, hvørt tað gjørdist B71 ella Giza/Hoyvík, sum skuldu fylgja miðvingum upp, og hvør fór at fáa gullið.
Eftir 17. og næstseinasta umfar sá tað út til, at MB hevði ognað sær gullið, meðan framvegis einki var avgjørt millum B71 og Giza/hoyvík um hitt uppflytingarplássið. Hetta mest tí B71 eitt sindur óvæntað snávaði móti teimum næstbestu í Fuglafirði.
Men síðani er komið undan kavi, at bæði MB og B71 hava sent kærur inn um ólógligar leikarar. MB hevur kært um dystin í Havn móti B36 20. september (16. umfar), sum teir taptu 3-2, og B71 hevur kært um dystin í Fuglafirði móti ÍF 27. september (17. umfar), sum teir taptu 2-0.
Sum skilst hevur B71 eina góða sak, og um teir fáa viðhald, so eru teir fluttir upp, og Giza/Hoyvík situr eftir við svartaperi. Og vinnur MB samstundis ikki sína kæru móti B36, so hevur B71 ein kjans at nápa gullið frá MB seinasta leikumfar leygardagin, tá júst bæði toppliðini møtast á Sandi.
Lítið man vera at ivast í, at tey í FSF royna at skunda eitt sindur undir Aganevndina, at kærurnar kunnu avgreiðast í hesi vikuni ÁÐRENN seinasta umfar, men Aganevndin hevur fullan rætt til at halda seg til galdandi tíðarfreistir. Bara óheppið ikki at vita endaligu støðuna, eftir at seinasta umfarið er leikað.
FaroeSoccer fylgir málinum.
EFTIRSKRIFT
Síðani hendan greinin var skrivað og løgd út, hevur FaroeSoccer hoyrt um trý onnur kærumál í 2. deild, sum ikki eru avgjørd enn. Vit hava eisini verið í samband við umsitingina hjá FSF og fingið hetta meira ella minni váttað.
Tað snýr seg um, at B68 hevur kært FC Suðuroy (15. umfar), Giza/Hoyvík hevur kært Víking (15. umfar), og Undrið hevur eisini kært Víking (16. umfar).
Umframt hesar kærur eru hópin av øðrum kærum komnar í lægri deildum skilst, so Aganevndin man hava úr at gera í hesum døgum!
