Español English Føroyskt

Er spæliloyvið í lagi?

hósdagur 28. februar 2013
FaroeSoccer fer við hesum at heita inniliga á øll feløg og leikarar um at hava síni spæliloyvi í lagi áðrenn kappingin byrjar, so sleppast kann undan keðiligu skriviborðsavgerðunum eftir dystarlok.

Vælkomin til FaroeSoccer á facebook


Tær koma á hvørjum ári líka so sikkurt sum amen í kirkjuni: kærurnar um leikarar, sum ikki eru skrásettir hjá FSF og tískil mangla spæliloyvi. Hóast FSF leingi hevur gjørt nógv fyri at stramma upp á hesum økinum, hendir tað framvegis ov ofta, at kærur koma um ólógligar leikarar.

Aloftast skal orsøkin sikkurt finnast í skiftandi ábyrgdarfólkum í ymsu feløgunum, og tað er væl skiljandi viðhvørt, men umberingar nytta bara einki longur, tí lóg er lóg – og allir dómarnir hjá Aganevndini seinastu árini staðfesta, at nú er ongin góða mamma longur: Ert tú ikki á FSF-leikaralistanum, tvs. tilmeldaður hjá FSF, so ert tú at meta sum ólógligur leikari!

Og so kann vera líkamikið um tú ert 10 ella 30 ára gamal, maður ella smágenta, og um tú altíð hevur leikað við sama felag, og at hetta kann prógvast á 200 dómaraseðlum aftur í tíðina. Tú SKALT bara standa á leikaralistanum hjá FSF! Kemur ein kæra um hetta, so er STEINsikkurt, at hon fær viðhald og trý vunnin stig skifta eigara (tað grettir ikki, at tað er tapandi liðið, sum kærir!).

At ein leikari er skrásettur á FaroeSoccer er ikki nøkur trygd fyri, at hann er tilmeldaður FSF, og at spæliloyvið er í lagið, hóast tað er ein góð ábending. FaroeSoccer hevur EINKI við spæliloyvi at gera!

Tað er eitt sindur ymiskt, hvussu feløg skráseta sínar leikarar, ella hvør hevur ábyrgdina av at gera tað. Ein tummilfingraregul ella ein standardprosedura kundi verið, at allir venjarar (eisini fyri sína egnu skuld) kekka sínar leikarar á leikaralistanum hjá FSF á fsf.fo áðrenn kappingarbyrjan, og ikki minst tá nýggir leikarar koma upp í hópin sum frálíður.

Tær flestu kærurnar koma um leikarar í lægru deildunum og í ungdómsdeildunum. Í sambandi við tær kappingarnar, sum FaroeSoccer skrásetur, so hendir hetta typiskt, tá ungir leikarar leika sínar fyrstu vaksnamannadystir (í 1. ella 2. deild og í kvinnudeildini) ella flyta felag. Tá verða teir brádliga “til” í systeminum, og borðið fangar!

Á aðalfundinum hjá FSF seinasta leygardag, boðaði forsetin frá í formansfrágreiðing síni, at FSF hevur keypt eina nýggja FMS skipan (Football Management System), eina fótbóltskipan at halda stýr á m.a. dystum (elektroniskum dómaraseðlum) og leikarum, og vónin er, at hendan verður tøk til 2014. Hetta verður væntandi ein stór hjálp og ein góð trygd hjá feløgunum í sambandi við leikaraskráseting.

Men inntil tá: vælsignaðu tit, latið ikki Aganevndina gera av, hvør vinnur og tapur, tit kunnu avgera hetta sjálvi á vøllinum!

Gott kappingarár øll somul – eisini tit mongu, sum FaroeSoccer (tíverri) ikki skrásetur... enn.

 

Sendið okkum dómaraseðlarnar
Til feløg og dómarar
Minnist til at senda okkum dómaraseðilin beint eftir loknan dyst í hesum kappingum:
Effodeildin, 1. deild menn, 2. deild menn, U18 dreingir, 1. deild kvinnur og Steypakappingarnar M/K.
Seðlarnir skulu sendast til faks 320516 ella tpost fotboltshagtol@gmail.com. Er nakar trupulleiki ella okkurt at spyrja um, so ringið 320515/520515.
Samstarvsfelagar
2010-2014