Español English Føroyskt

Ein millión hevur sæð Føroyar spæla

hósdagur 21. februar 2013
Sjálvt um vit mangan halda, at fáir áskoðarar eru til dyst, tá føroyska landsliðið spælir, so hava næstan 1,1 millión áskoðarar sæð føroyska landsliðið spæla í almennu dystunum síðani 1988.

Vælkomin til FaroeSoccer á facebook



Hvussu nógvir áskoðarar eru til dyst hjá føroyska landsliðnum?

Tann spurningurin verður mangan havdur á lofti til nógv ymisk høvi.

Nú kunnu vit í øllum førum sláa fast, at talið ikki er so øgiliga lítið, tá samanum kemur.

Almennu áskoðaratølini, sum eru innlisin í dátuskránna hjá FaroeSoccer, vísa, at samanlagda áskoðaratalið til teir 148 dystirnar, síðani Føroyar fingu altjóða limaskap, er 1.089.035. Umroknað til miðaltal gevur tað 7.358 áskoðarar til hvønn dyst.

Tað er sama land, Skotland, sum eigur tvær tær størstu áskoðarafjøldirnar, tá Føroyar hava spælt.

Størsta áskoðarafjøld, sum føroyska fótbóltslandsliðið hevur havt, eru teir 50.059 áskoðarar, sum vóru á Celtic Park í Glasgow tann 2. september í 2006, tá Føroyar taptu 6-0 í undankappingini til EM 2008.

Trý ár frammanundan vóru 40.901 áskoðarar á Hampden Park, tá Føroyar taptu 3-1 í undankappingini til EM 2004. Tað var í tí dystinum, at Julian Johnsson gav skotum ein hvøkk, tá hann javnaði til 1-1, tá eitt korter var eftir av fyrra hálvleiki.

Triðstørsta fjøldin, sum Føroyar hava spæld fyri var í Lens í september í 2005, tá 40.115 áskoðarar hugdu at dystinum millum Frakland og Føroyar, sum vertirnir vunnu 3-0.

Á fjórða plássi kemur dysturin í gomlu Parkini í Keypmannahavn, tann 10. oktober í 1990, tá 38.500 áskoðarar sóu Danmark vinna 4-1 á Føroyum. Hetta var bara ein mánað eftir bragdið í Landskrona.

Fimtastørsta fjøldin var í dystin móti Týsklandi í Hannover í 2002. Tá vóru 37.000 áskoðarar.

 

Sendið okkum dómaraseðlarnar
Til feløg og dómarar
Minnist til at senda okkum dómaraseðilin beint eftir loknan dyst í hesum kappingum:
Effodeildin, 1. deild menn, 2. deild menn, U18 dreingir, 1. deild kvinnur og Steypakappingarnar M/K.
Seðlarnir skulu sendast til faks 320516 ella tpost fotboltshagtol@gmail.com. Er nakar trupulleiki ella okkurt at spyrja um, so ringið 320515/520515.
Samstarvsfelagar
2010-2014