So tapti B36

2. DEILD MENN - 15. UMFAR

Eftir 14 tey fyrstu umførini hevði B36 enn ongan dyst tapt, og teir ætlaðu uttan iva at klára gjøgnum kappingina ósigraðir, men soleiðis skuldi ikki verða. Giza/Hoyvík, sum í síðstu viku fekk bank á Argjum, skuldi vinna dystin ímóti B36 fyri at varðveita vónina um uppflyting. Tað eydnaðist eisini samstarvsfelagnum at vinna 3-1, eiit sindur óvæntað men uppiborið.

Hini bæði toppliðini, Undrið og TB, vunnu uttan stórvegis trupulleikar ímóti Skála og Royn. Við bert trimum dystum eftir má B36 framvegis roknast sum favorittur, tí teir hava allarhelst lættastu skránna eftir við dystum móti FC Suðuroy, ÍF og Royn. Hini trý toppliðini øll hava ein innanhýsis dyst, Undrið hevur bæði Giza/Hoyvík og TB eftir.

Í hinum endanum sær út til, at 07 Vestur hevur givið skarvin yvir. Vágamenn møttu ikki til dystin ímóti ÍF, og av tí at hetta er annar dysturin felagið ikki møtir til, so verða teir allarhelst koyrdir úr kappingini. Sera keðiligt fyri kappingina, men eisini óheppið fyri 07 Vestur, sum allarhelst kemur hava sínar næstbestu menn í 3. deild komandi ár, meðan teir bestu hjá 07 Vestur uttan iva koma at spæla í Effodeildini.

Men tað er ikki bara í toppinum, at stórur spenningur er. Spenningurin er mist líka stórur í botninum, har bert tvey stig eru millum ÍF, Skála, AB og Royn. Umframt ÍF, sum vann uttan dyst móti 07 Vestur, so var AB einasta botnliðið, ið fekk stig í vikuskiftinum við 0-0 vestri á Eiðinum ímóti FC Suðuroy.

Komandi umfar verður ein sera spennandi grannauppgerð í Gundadali millum Undrið og Giza/Hoyvík. Á Argjum verður ein sannur botngysari, tá ÍF kemur á vitjan hjá Argjamonnum. 16. og triðseinasta umfar verður leygardagin 8. september: