Áheitan á feløg og dómarar
mikudagur 12. mars 2014
FaroeSoccer fer aftur í ár at gera sítt allarítarsta at skráseta dómaraseðlarnar skjótt og væl, men tað krevur eisini ein innsats frá feløgunum og dómarunum. Best er at spæla saman!
Nýggja kappingarárið er um hornið, og aftur í ár samstarva FaroeSoccer og Fótbóltssambandið um dómaraseðlarnar í teimum kappingum, har FSF ásetur dómararnar.
Sum vanligt eru altíð útskiftingar av álitisfólkum í feløgunum – nevndarlimir, samskiparar, fjølmiðlafólk, venjarar o.o. – og harumframt koma nýggir dómarar til. Og sjálvsagt alt gott um hetta, men tað ger eisini, at áhaldandi kunning má til, so FaroeSoccer kann halda støðuga tænastustøðið mótvegis FSF og almenninginum.
FaroeSoccer heitir inniliga á allar dómarar og øll feløg um at lesa hesa kunningina, takk fyri.
GEVIÐ GÆTUR
Felagið eigur ábyrgdina
Tað er felagið – ikki dómarin – sum hevur ábyrgdina av, at dómaraseðilin verður sendur FaroeSoccer beint eftir loknan dyst. Heimaliðið skal hjálpa dómaranum at avgreiða hetta – eisini tá man hevur tapt!
Brend brotsspørk
FaroeSoccer vil fegin hava fráboðan um øll brend brotsspørk, hóast hetta ikki er eitt krav á dómaraseðlinum. Hetta ger skrásetingina av dystunum meira áhugaverda og viðkomandi.
Skiftingar í kappingini U18 dreingir
Heitt verður á allar dómarar, sum døma U18 dreingir – ið sum kunnugt leika við flúgvandi útskifting – um at skráseta, um eykaleikarar koma inn. Her er ikki endiliga neyðugt við minutttølum, bara krossa teir av, so man veit, at teir eru brúktir.
Harafturat er her ein tummilfingraregul til allar dómarar:
Takk fyri alla góða hjálp.
Vit spæla saman!
FaroeSoccer
